जागिरबाट हटाइएपछि अस्पतालका कर्मचारीले आफ्नै शरीरमा पेट्रोल छर्केर लगाए आगो
जेठ २६, २०७७ सोमबार १४:१३:०
अछाम : बयलपाटा अस्पतालका एकजना कर्मचारीले शरीरमा आगो लगाएर आत्महत्याको प्रयास गरेका छन् । साँफेबगर नगरपालिका-६ भागेश्वरका सिद्धार्थ आउजीले सोमबार अस्पतालमै शरीरमा पेट्रोल छर्केर आगो लगाएका हुन् ।
उनी अस्पतालका सरसफाइ कर्मचारी हुन्। थप उपचारका लागि उनलाई हेलिकोप्टरमार्फत कोहलपुर लगिएको छ। उनको शरीर नराम्रोसँग जलेको अस्पातलका एकजना कर्मचारीले जानकारी दिए । बयलपाटा अस्पतालले दाताहरुबाट रकम कटौती हुँदै आएपछि कर्मचारी पाल्न नसक्ने भन्दै ३२ जना कर्मचारीलाई जिम्मेवारीबाट हटाइदिएको छ। त्यसको चौतर्फी विरोध भइरहेको छ ।
कर्मचारी हटाइएको सूचीमा सिद्धार्थ समेत रहेका छन्। उनलाई दुई महिना अगाडि नै हटाइएको पत्र दिइएको थियो । उनको पुरानो नियुक्ति सकिन अझै दुई महिना बाँकी रहेको बताइएको छ।
यता बयालपाटा अस्पतालले भने आर्थिक अभाव भएको भन्दै कार्यसम्पादनको आधारमा कर्मचारी हटाएको जानकारी दिएको छ।
प्रतिक्रिया दिनुहोस !
