रोल्पा : रोल्पामा आइतबार ३ जना कोरोना संक्रमित थपिएका छन् । भेरी अस्पताल नेपालगञ्जमा गरिएको पिसिआर परीक्षणबाट १ महिलासहित ३ जनामा कोरोना संक्रमण देखिएको हो । नयाँ संक्रमितसहित जिल्लामा संक्रमितको संख्या ४४ पुगेको छ ।
आइतबार दिउँसो २ बजे अस्तालले जारी गरेको सूचना अनुसार सुनिलस्मृति गाउँपालिकाको वडा नं. ४ र ७ का तीन जनामा कोरोना संक्रमण देखिएको हो । सुनिलस्मृति गाउँपालिका–४ का २० वर्षीय पुरुष, वडा नं. ७ का २१ वर्षीय पुरुष र २५ वर्षीया महिलामा संक्रमण देखिएको अस्पतालले जनाएको छ । यसअघि सुनिलस्मृति गाउँपालिकामा ३२ जना संक्रमित फेला परेका थिए । योसहित गाउँपालिकामा संक्रमितको संख्या ३५ पुगेको छ । संक्रमितमा ३ महिला र ३२ पुरुष रहेका गाउँपालिका स्वास्थ्य शाखाकी संहसंयोजक सावित्रा थापाले जानकारी दिइन् ।
पूर्वी रोल्पाको लुंग्री गाउँपालिकामा यसअघि नै १ महिला र १ पुरुष कोरोना संक्रमित देखिएका थिए । रोल्पा नगरपालिकाका मेयर पुरण केसीका अनुसार नगरपालिकामा ७ संक्रमित छन् ।
जिल्ला आइलोसेन केन्द्रका इन्चार्ज डा. अनिल केसीका अनुसार ६ महिनाकी गर्भवती महिलासहित ४० जना कोरोना संक्रमित आइसोलेसन केन्द्रमा छन् । एक संक्रमित बालक सुनिलस्मृति गाउँपालिकाको सूर्योदय विद्यालयको क्वारेन्टाइनमै छन् । आइतबार संक्रमित पहिचान भएकालाई पनि सदरमुकाम लिबाङको जलजला क्याम्पसमा संचालन भइरहेको आइसोलेन केन्द्र ल्याउने तयारी भइरहेको छ ।
५० बेडसहितको आइसोलेसन केन्द्र बनाउने प्रदेश सरकारको निर्देशन भए पनि ७० बेड क्षमताको आइलोसेन केन्द्र संचालन गर्न सक्ने गरी तयारी गरिएको डा. केसीले जानकारी दिए । जिल्लामै पहिलोपटक व्यवस्थित आइसोलनस केन्द्र संचालनमा रहेको जनाइएको छ । जहाँ प्रत्येक कोठामा सिसी क्यामेरा र इन्टरकोम फोनसमेत जडान गरिएको छ ।
सिसी क्यामेराबाट स्वास्थ्यकर्मीको टोलीले नियमित निगरानी गर्न सजिलो भएको छ भने स्वास्थ्यमा केही समस्या आएमा संक्रमितले जुनसुकै बेला डा.को टिमलाई खवर गर्न सहज भएको छ । ‘संक्रमितको दैनिक चार पटक नियमित जाँच गर्दै आएका छौं’, डा. केसी भन्छन्, ‘आइलोसेनमा रहेका सबैको स्वाथ्य अवस्था सामान्य रहेको छ ।’
प्रतिक्रिया दिनुहोस !
