काठमाडौं : कृष्ण काफ्ले, अस्मिता अधिकारी, बुद्ध लामा र समीक्षा अधिकारीको संयुक्त आवाजमा तयार पारिएको नेपाली लोकपप गीत ‘मैले बोलेको छैन ढाँटेर’को म्युजिक भिडियो सार्वजनिक गरिएको छ। गीतमा अर्जुन पोखरेलको संगीत छ।
चार युवा गायन स्टारद्वारा अभिनीत तथा स्वरबद्ध म्युजिक भिडियोलाई विश्व संगीत दिवसको अवसर पारेर आइतबार रिलिज गरिएको हो। नेपसिनेमाको प्रस्तुतिमा द डिभाइन म्युजिकको युट्युब च्यानलमार्फत म्युजिक भिडियो सार्वजनिक गरिएको हो। काफ्लेले यसअघि धेरै सुपर हिट गीतमा स्वर दिइसकेका छन् भने लामा नेपाल आइडलका विजेता हुन्।
यस्तै अधिकारी पनि नेपाल आइडलबाटै उदाएकी गायिका हुन्। उनले यसअघि केही हिट गीतमा स्वर दिएकी छन्। युट्युबबाट चर्चित बनेकी गायिका समीक्षा अधिकारीको पनि गीतमा दमदार स्वर तथा अभिनय छ। भिडियो विधान कार्कीले निर्देशन गरेका छन्। उनले यसअघि धेरै म्युजिक भिडियो निर्देशन गरिसकेका छन्। यसअघिका भिडियोभन्दा यो भिडियो र कन्सेप्ट फरक रहेको निर्देशक कार्कीले बताए। लक डाउनको समयमा सामाजिक दूरी कायम गरी खिचिएको यो गीतको भिडियो उत्सव दाहालले खिचेका हुन् भने सम्पादन विकास दाहालको छ।
भिडियोलाई फिल्मी शैलीको बनाइएको छ। दुई दाजुभाइले दुई दिदीबहिनीको प्रेमकथा बुनेको भिडियोले केही सकरात्मक सन्देश समेत प्रवाह गरेको छ।
प्रतिक्रिया दिनुहोस !
