जोमसोम : मुस्ताङको उत्तरी कोरलानाका तथा उपल्लो मुस्ताङका दुई स्थानीय तह राष्ट्रिय विद्युत प्रशारण लाइनले जोडिने भएको छ । गण्डकी प्रदेशको उज्यालो प्रदेश कार्यक्रम अन्तरगत उपल्लो मुस्ताङमा धमाधम विद्युत जडानको काम भइरहेको जनाइएको छ ।
गण्डकी प्रदेश सरकारले नेपाल सरकारसँगको सहकार्यमा राष्ट्रिय प्रशारण लाइन र विद्युत पहुँच पुग्न नसक्ने स्थानमा सौर्य उर्जा विस्तारको कार्यक्रम अघि बढाएको हो । उपल्लो मुस्ताङको लोमान्थाङ र लोघेकर दामोदरकुण्ड गाउँपालिकामा विद्युत विस्तार तथा सौर्य उर्जा विस्तारको योजना रहे पनि सौर्य उर्जा बिस्तार गर्ने कार्य स्थगित भएको छ । चालु आर्थिक वर्ष २०७६/०७७ मा परेको आवश्यक बजेटबाट विद्युत बिस्तारको योजना अघि बढाइएको हो । त्यहाँ प्रदेश सरकारको निर्देशन बमोजिम विद्युत पोल ढुवानी गरी काम अघि बढेको छ ।
सांसद बिष्टका अनुसार उज्यालो प्रदेश कार्यक्रममा उपल्लो मुस्ताङको लोमान्थाङ गाउँपालिकालाई राष्ट्रिय विद्युत प्रशारण लाइनमा जोड्नका लागि नेपाल विद्युत प्राधिकरण र प्रदेश सरकारको संयुक्त पहलमा मुख्य प्रशारण लाइनलाई चाहिने आवश्यक पोल पुगिसकेको जानकारी दिए । प्रदेशले त्यहाँ लोमान्थाङमा ३ सय ८६ पोल र शाखामा १ सय ८० थान विद्युत पोल पुर्याएको छ भने लोघेकर दामोदरकुण्डमा मुख्य प्रशारण लाइनलाई १ सय ९६ थान र शाखाका लागि ७० थान विद्युत पोल लगायतका सामाग्री खरिद गरी म्याग्दीको तातोपानी विद्युत बितरण केन्द्रसम्म पुर्याएको थियो ।
त्यहाँबाट पोल ढुवानी खर्च स्थानीय तहले गर्ने गरी सम्बन्धित स्थानमा पुगेर काम अघि बढेको सांसद बिष्टले जानकारी दिए । उनले विद्युतको प्राविधिक जडान कार्य प्राधिकरणका कर्मचारी खटिएको बताए। उपल्लो मुस्ताङका २ पालिकामा विद्युत पहुच बिस्तार संम्भव नभएका स्थानमा नविकरणीय सौर्य उर्जा बिस्तारका लागि आवेदन खुल्ला गरिएको थियो ।
चालु वर्ष करिव ६ सय बढीले सौर्यउर्जाका लागि आवेदन दिएको जलउत्पन्न प्रकोप तथा सिचाई विकास डिभिजन कार्यालका प्रमुख झलकमोहन ओझाले जानकारी दिए । चालु वर्ष सौय उर्जाका लागि प्रदेश सरकारले १ करोड १६ लाख बिनियोजन गरेको थियो । सौर्य उर्जाको ठेक्का सम्झौता ७८ लाख ६१ ह्जारमा लिएको ओझाले बताए । स्थानीयको माग अनुसार प्रदेश सरकारले ७५ प्रतिशत अनुदानमा सोलार वितरण गर्न लागिएको थियो । हाल सबै प्रक्रिया कोरोना कहले रोकिएको ओझाको भनाई छ । उनका अनुसार लोमान्थाङको १,२,३ र ४ वडा ,लोघेकर दामोदरकुण्डको १,२ र ३ र वारागुङ मुक्तिक्षेत्रको ४ र ५ वडाका स्थानीयले सौर्य उर्जा माग गरेका हुन् ।
गण्डकी प्रदेशले आर्थिक वर्ष ०७७-०७८ का लागि संघीय सरकारसंग समन्वय गरी तनहु ,गोरखा ,नवलपुर ,लमजुङ ,मनाङ ,बाग्लुङ ,म्याग्दी र मुस्ताङमा राष्ट्रिय विद्युत प्रशारण लाइन बिस्तार गर्न १८ करोड बजेट बिनियोजन गरेको हो । यस्तै ,राष्ट्रिय विद्युत प्रशारण लाइन पुग्न नसक्ने स्थानमा सौर्य उर्जा बिस्तार गर्नका लागि प्रदेशले मुस्ताङसहित मनाङ,म्याग्दी र गोरखाका लगायतका जिल्लामा १ हजार १ सय ६० घरधुरीलाई सौर्य उर्जामा अनुदान उपलब्ध गराउन २ करोड ३० लाख बजेट बिनियोजन गरेको छ ।
प्रतिक्रिया दिनुहोस !
