मुस्ताङको चैले-भेना सडकको धमाधम स्तरोन्नति

जोमसोम : मुस्ताङको जोमसोम-कोरला १ सय १० किलोमिटर सडकखण्डको चैले-भेना १३ किलोमिटर सडक स्रोन्नतिको काम अहिले धमाधम संञ्चालनमा आएको छ । कालिगण्डकी करिडोरको राष्ट्रिय गौरवको बेनी-जोमसोम-कोरला सडक आयोजना अन्तरगत कन्टेक कान्छाराम कोशी एण्ड न्यौपाने जेभीले उक्त बाटो निर्माण गर्ने जिम्मा लिएको हो ।

जोमसोम-कोरला सडकखण्डको ७ वटा प्याकेज मध्ये त्यसखण्डको समर-भेना ८ सय मिटर दुरी सबैभन्दा जोखिमयुक्त स्थानमा पर्छ । त्यहाँ सडक बिस्तारको कामसमेत चुनौतीपूर्ण छ । त्यहा सडक फराकिलो पार्न रककटिङ गर्ने क्रममा एक उपकरण चालकले समेत ज्यान गुमाएका थिए । निर्माण कम्पनीले ढिलो काम सुरु गरेको थियो ।

गत वर्षदेखि त्यस खण्डमा ठुलाठुला पहाड कटिङ गरी सडक चौडा गर्ने काम भएको थियो । विश्व व्यापी माहामारीको रुपमा फैलिएको नोवल कोरोना भाइरस ( कोभिड-१९) रोकथाम तथा नियन्त्रणका लागि सरकारले लक डाउन गरेसँगै त्यसखण्डको काम रोकिन पुगेको थियो । सरकारले लकडाउनकै क्रममा पछिल्लो समय विकास पूर्वाधारका काम सञ्चालन गर्ने जनाएपछि त्यसखण्डको कामअघि बढेको करिडोर सडकले जनाएको छ । यसका लागि जिल्ला प्रशासन कार्यालय मुस्ताङले जिल्लामा कोरोना जोखिम न्युनीकरण गर्न विभिन्न शर्त पालना गरी  काम गर्न आह्वान गरेको थियो । त्यसपछि उक्त खण्डको सडक विस्तारको काम गर्न गत जेठको दोश्रो साता करिडोर सडकका उपकरण चलाउने अपरेटर काममा फर्किएका थिए ।

जोमसोम-कोरला सडकको चैले-भेना १३ किमी सडक विस्तारको जिम्मा कन्टेक कान्छारा कोशी एण्ड न्यौपाने जेभीले ४७ करोड ६२ लाखमा सम्झौता गरेको थियो । जोमसोम-कोरला ७ प्याकेजको काम २०७४ साल श्रावणदेखि सुरु भएको थियो । निर्माण कम्पनीले चैले—भेना खण्डको ७० प्रतिशत काम संम्पन्न गरेको करिडोर सडकका सबइन्जिनीयर किरण घिमिरेले जानकारी दिए । सडकको ३० प्रतिशत काममध्ये विस्फोटक पदार्थ पड्काएर पहाडको रककटिङ गर्ने ,सडक चौडा र ग्रेड मिलानको काम भइरहेको सबइन्जिनीयर घिमिरेले बताए ।

करिडोरको जोमसोम-कोरला खण्डको चैले-भेना सडकमा अहिले करिव ४ दर्जन मजदुर कार्यरत छ । निर्माण कम्पनीका अनुसार सडक स्तरोन्नतिका लागि ग्रेडर,ब्रेकर ,स्काभेटर ,ब्याकु र टिपरसहितका चालक र सहचालक छन् । यस्तै ,उनीहरुको व्यवस्थापनका लागि पनि थप मजदुर छन् । सडक विस्तारमा खटिएका मजदुर सडक छेउ पाल टागेर बस्ने गर्छन् । कोरोना जोखिम कम उनीहरुलाई सडकमै व्यवस्था मिलाइएको निर्माण कम्पनीले जनाएको छ । उनीहरुलाई जिल्ला प्रवेश गराउँदा मुस्ताङ घासा सीमानाकामा आरडिटी परीक्षण गराइएको थियो ।

राष्ट्रिय गौरवको जोमसोम कोरला सडकको ७ प्याकेजमध्ये दिवा रौटाहा एपेक्सको छोसेर-कोरोला १४ किमी, दिवा डाफे एपेक्सको ग्रीन ताङ्वेदेखि चैले ११ किमी र बज्रगुरु खड्गकृष्ण जेभीको जोमसोमदेखि ताङ्वे १८ किमी सडक करिडोर सडकलाई हस्तान्तरण भइसकेको छ । यस्तै ,कञ्चनजंघा लामा बिल्डर्स विरुवाको भेना-झैते १२ किमी सडकको ९५ प्रतिशत पूरा भएको सबइन्जिनीयर घिमिरेले जानकारी दिए । 

यो प्याकेज असार मशान्तसम्म सकिने उनले बताए । उनका अनुसार कञ्चनजंघा लामा मोतिदानको झैते -चराङ १९ किमीको काम ६५ प्रतिशत र तामाङ गौरी पार्वती कोशी एण्ड न्यौपाने जेभीको चराङ-छोसेर  प्याकेजको ६० प्रतिशत काम भएको छ । करिडोरका अनुसार चराङ-छोसेरको बाँकी ४० प्रतिशत काम कोरोना कहरका कारण रोकिएको छ । लोमान्थाङमा जिल्लामा काम गर्ने मजदुरलाई काम गर्न रोक लगाइएकाले समस्या भएको हो ।

उत्तरी कोरलानाका जोड्ने राष्ट्रिय गौरवको बेनी-जोमसोम-कोरला सडक २०७४ सालबाट सुरु भएको हो । झन्डै ६ अर्ब बजेटको बेनी-जोमसोम-कोरला विस्तारले गण्डकी प्रदेशको मात्र नभइ नेपालकै आर्थिक समृद्धिमा योगदान पुग्ने मुस्ताङका संघीय सांसद प्रेमप्रसाद तुलाचनले जानकारी दिए ।