बैतडी : बैतडीका स्थानीय तहले कृषिलाई प्राथमिकतामा राखेर आगामी आर्थिक वर्षको नीति तथा कार्यक्रम र बजेट सार्वजनिक गरेका छन् । बुधबार सार्वजनिक गरिएको नीति तथा कार्यक्रम र बजेटमा सबै जसो स्थानीय तहले कृषिलाई प्राथमिकतामा राखेर युवालाई स्वरोजगार बनाउने दाबी गरेका छन् । यस्तै कोरोना भाइरस नियन्त्रण र रोकथामका लागि पनि स्थानीय तहले बजेट विनियोजन गरेका छन् ।
जिल्लाको सुर्नया गाउँपालिकाले आगामी आर्थिक वर्षका लागि ३९ करोड १३ लाख बराबरको बजेट सार्वजनिक गर्दै कृषि, स्वास्थ्य, पशुपालन, धार्मिक पर्यटनलाई प्राथमिकतामा राखेको छ । गाउँसभामा नीति तथा कार्यक्रम र बजेट प्रस्तुत गर्दै उपाध्यक्ष लीला बिष्टले कोरोना भाइरसबाट उत्पन्न समस्या सम्बोधनका लागि गाउँपालिकाले नीति लिएको बताइन् । उनले भनिन्, ‘विदेशबाट फर्केका नागरिकलाई स्वदेशमै कृषिमार्फत आत्मनिर्भर बनाउनका लागि कृषिलाई प्राथमिकता दिएका छौं ।’
क्वारेन्टाइनमा व्यवस्थापनदेखि लिएर आइसोलेसन निर्माणका कुरा नीति कार्यक्रममा समेटिएको गाउँपालिकाका अध्यक्ष बीरबहादुर बिष्टले बताए । उनले भने, ‘अहिलेको महामारीसँग जुध्न र युवालाई स्वरोजगार उन्मुख बनाउने हिसाबले नीति, कार्यक्रम र बजेट ल्याएका छौं ।’यस्तै दोगडाकेदार गाउँपालिकाले ५५ करोड ४२ लाख ४३ हजार बराबरको बजेट सार्वजनिक गरेको छ । गाउँपालिकाले आर्थिक क्षेत्रमा ३० प्रतिशत, सामाजिक क्षेत्रमा ३० प्रतिशत, पूर्वाधार विकासमा ३० प्रतिशत, विपद् व्यवस्थापन ६ प्रतिशत, संस्थागत विकासमा २ प्रतिशत र बित्तीय सुशासनमा २ प्रतिशत बजेट विनियोजन गरेको गाउँपालिका अध्यक्ष चक्र कार्कीले बताए । ‘लघु उद्यम, तरकारीखेतीमा जोड दिंदै युवाहरुलाई कृषितर्फ आकर्षित गर्न बजेट विनियोजन गरेका छौं ।’
यस्तै पुर्चौंडी नगरपालिकाले ५९ करोड ९६ लाख ९१ हजार बराबरको बजेट सार्वजनिक गरेको छ । कृषि, स्वास्थ्य, स्वरोजगार लगायतका कुरालाई प्राथमिकतामा राखेर आगामी आर्थिक वर्षको बजेट सार्वजनिक गरिएको नगर प्रवक्ता दलबहादुर धामीले जानकारी दिए । यस्तै सिगास गाउँपालिकाले ४७ करोड बराबरको बजेट सार्वजनिक गरेको छ । कोभीड १९ ले निम्त्याएको संकट समाधानका साथै पूर्वाधार निर्माणमा बजेटले प्राथमिकता दिएको गाउँपालिका उपाध्यक्ष द्रोपती चन्दले जानकारी दिइन् । उनले भनिन्, ‘हामीले दुर्गम ठाउँमा सडकको पहुँच र कृषि क्षेत्रलाई प्राथमिकतामा राखेका छौं । यस्तै कोभीड १९ नियन्त्रण र रोकथाम गर्न पनि बजेट विनियोजन गरेका छौं ।’
यस्तै शिवनाथ गाउँपालिकाले ३५ करोड ८१ लाख ७५ हजार बराबरको बजेट सार्वजनिक गरेको छ । युवा स्वरोजगारी र कृषिलाई प्राथमिकतामा राखेर बजेट ल्याइएको गाउँपालिका उपाध्यक्ष कुस्मा चन्दले जानकारी दिइन् । यस्तै मेलौली नगरपालिकाले ५९ करोड ४२ लाख ७२ हजार बराबरको बजेट सार्वजनिक गरेको नगर उपप्रमुख राधा ओझाले जानकारी दिइन् । कृषिलाई प्राथमिकता दिएर बजेट आएको र कृषिमा यूवालाई जोड्ने हिसाबले नीति कार्यक्रम ल्याइएको उनले बताइन् ।
पाटन नगरपालिकाले बुधबार नगरसभामा नीति तथा कार्यक्रम मात्रै पेश गरेको छ । समुन्नत नगर बनाउने हिसाबले नीति तथा कार्यक्रम ल्याइएको र केही दिनभित्रै बजेट ल्याउने नगरप्रमुख केशवबहादुर चन्दले जानकारी दिए । यस्तै डिलाशैनी गाउँपालिकाले पनि नीति तथा कार्यक्रम मात्रै सार्वजनिक गरेको छ ।
जिल्लाको दशरथचन्द नगरपालिकाले नगरपालिका क्षेत्र सिल गरिएकाले नीति कार्यक्रम र बजेट ल्याउन नसकेको जनाएको छ । नगर क्षेत्र सिल गरिएकाले असार १६ गतेपछि नीति कार्यक्रम र बजेट ल्याइने नगर प्रवक्ता चक्रप्रसाद शर्माले जानकारी दिए । यस्तै वर्षातका कारण पञ्चेश्वर गाउँपालिकाले पनि बुधबार बजेट सार्वजनिक गर्न नसकेको बताइएको छ ।
प्रतिक्रिया दिनुहोस !
