अमेरिका : अहिले जमाना युट्युबको छ भन्दा हुन्छ । युट्युबमा नानाथरीका भिडियो अपलोड गरेर सब्सक्राइब बढाउनेहरू असंख्य छन् । तर २० मिलियन सब्सक्राइबर रहेकी एक अमेरिकी युट्युबरले भने युट्युब प्ल्याटफर्म नै छाड्ने घोषणा गरेकी छन् ।
युट्युब स्टार जेन्ना मउरीले आफ्नो युट्युब च्यानल ‘जेन्ना मार्बल्स’मा अपलोड गरेका केही भिडियोबाट रंगभेदलाई प्रोत्साहित गरेको आरोप लागेपछि उनले यट्युब प्ल्याटफर्मबाटै अलग्गिने घोषणा गरेकी हुन् । उनले एक भिडियो सन्देशमार्फत आफ्नो च्यानलमा अपलोड भएको रंगभेदी विषयवबस्तु सहितको भिडियोका लागि माफीसमेत मागेकी छन् ।
मउरीको युट्युब च्यानलमा २० मिलियन सब्सक्राइबर छन् । उनले अपलोड गरेका केही भिडियोमा अश्वेत समुदाय र एसियन मूलका समुदायमाथि व्यंग्य गरेकी थिइन् ।
अमेरिकामा अश्वेत समुदायका जर्ज फ्लोयडको प्रहरीले नियन्त्रणमा लिने क्रममा मृत्यु भएपछि संसारभर रंगभेदविरुद्ध आन्दोलन चर्किएको छ । त्यसै क्रममा मिडिया र सामाजिक सञ्जालमा समेत रंगभेदी विषयवस्तुविरुद्ध विश्वभर आवाज उठिरहेको छ । यसले छिमेकी मुलुक भारतमा समेत तरंग पैदा गरेको छ । -एजेन्सी
प्रतिक्रिया दिनुहोस !
