जोमसोम : मुस्ताङको घरपझोङ गाउँपालिका—४ जोमसोममा बसपार्कको कालोपत्रे निर्माणको काम निर्धारितबाट थप २ वर्ष बितिसक्दा पनि आधा काम बाँकी नै छ ।
सम्झौता अवधि २ वर्ष ६ महिना रहेको जोमसोम बसपार्क ५ वर्षमा आधा काम मात्रै सम्पन्न भएको हो । बसपार्कको जग्गा सम्याउने, केही स्थानमा पर्खाल लगाउने र सबवेश मिलाउने लगायत काम संम्पन्न भएको हो । तर बसपार्कको बाँकी अधुरो कामले निरन्तरता पाउन नसक्दा बसपार्क निर्माणको काम ओझेलमा परेको हो । संघीयता अघि साविक डिभिजन कार्यालय बाग्लुङले २०७३ सालमा २ करोड ५१ लख लागतमा ठेक्का टेन्डर गरेको थियो ।
उसले बसपार्कको बिस्तृत परियोजना प्रतिप्रतिवेदन डिपिआर तयार गरेको थियो । बसपार्कको क्षेत्रफल २ सय मिटर लम्बाई १ सय मिटर चौडाई रहेको भए पनि लागत योजनाले नथेग्ने भएपछि लम्बाइ र चौडाइतर्फ २५ मिटर क्षेत्रफल घटाइएको थियो ।
जोमसोम बसपार्क निर्माणका लागि त्यसबेला डिभिजन कार्यालय मार्फत १ करोड बजेट निकासा भएको थियो । त्यो रकमले बसपार्कको संरचना निर्माणको कामलाई अघि बढाएको थियो । त्यसपछि बसपार्कको कुनै काम अघि बढ्न सकेन ।
संघीयता कार्यान्वयन पूर्व सुरुआत भएको जोमसोम बसपार्क त्यसपछि डिभिजन कार्यालय खारेज हुँदा बसपार्क निर्माणको काम ओझेलमा परेको हो । बहुवर्षीय आयोजनाको रुपमा सुरु गरिएको बसपार्क त्यसपछि संघीयतापछि सहरी विकास मन्त्रालय अन्र्तगत संघीय आयोजना कार्यान्वन इकाइ कास्कीले लिएको थियो ।
बसपार्कलाई १ करोड बजेटपछि इकाइमा जिम्मेवारी सरेपछि नयाँ बजेट निकासा भएन । बसपार्क निर्माणको ५ वर्र्ष पुग्दा चालु वर्षको सुरुआतमा ५ लाख बजेट राखियो । उक्त रकम बसपार्क निर्माणका लागि पर्याप्त थिएन । बसपार्क बनाउने जिम्मा लिएको रोशन अमित जेभीले तोकिएको बजेट बाहेक थप ४५ लाख बराबरको क्रेडिट काम गरेको संघीय आयोजना कार्यान्वयन इकाइ कास्कीका इन्जिनीयर सुशील आर्चायले बताए ।
प्रतिक्रिया दिनुहोस !
