डोल्पा : डोल्पामा संकलन गरिएको स्वाब पठाउन नसकेपछि जिल्ला सदरमुकाम दुनैमा नै थन्किएको छ । सोमबार दुनै, जुफाल र त्रिपूराकोटमा संकलन गरिएको ३ सय ६३ जनाको स्वाब ढुवानी हुन नसकेपछि दुनैमा नै थन्किएको हो ।
सोमबार ३१ र ३२ वर्षका दुईजनाको रिपोट पोजिटिभ आएपछि एकै पटक ठुलो संख्यामा पिसिआर परीक्षणका लागि स्वाब संकलन गरिएको र जहाजको उडान नभएपछि दुनैमा नै राख्नु परेको प्रमुख जिल्ला अधिकारी सुरेस सुनारले जानकारी दिए । कोरोना पोजिटिभ भएका दुबैजना जिल्ला प्रहरी कार्यालयमा कार्यरत प्रहरी हुन्। उनीहरुको कन्टयाक्ट ट्रेसिङमा परेका सयौं नागरिकको पीसीआर परीक्षणको लागि स्वाब संकलन गरिएको थियो ।
'जहाज आउन सकेन हेलीकप्टरको लागि पहल गरेका हौं । सकिएन । आज डिफ्रिजमा राखेका छौँ भोलि पनि जहाज नआएको खण्डमा पैदलमार्गबाटै भए पनि पठाउनुपर्ने हुन्छ', प्रमुख जिल्ला अधिकारी सुनारले बताए । एकै दिन ३ सय ६३ जनाको स्वाब संकलन भयो तर ढुवानीको ब्यवस्था नहुँदा जिल्लामा नै राख्नुपर्ने बाध्यता आएको स्वास्थ्य प्रमुख डाक्टर सिजन रावलले बताए । डाक्टर रावलले ७२ घण्टासम्म राख्न मिल्ने हो तर समयमा पठाउँदा राम्रो हुने भएकोले छिटो पठाउन पहल गरिएको तर नसकिएको बताए । उनले प्रदेश सरकारसँग समेत अनुरोध गरेको जानकारी दिए ।
जहाज, गाडीमा जिल्ला आएका र दुनैमा नै पोजिटिभ देखिएका सुरक्षाकर्मिको कन्टयाक्ट ट्रेसिङमा रहेका अन्य नागरिकको स्वाब संकलन भएको भए पनि स्वाब नेपालगञ्ज नगएपछि नागरिक झनै त्रसित भएका छन् । सुर्खेतमा भएको पिसिआर मेसिनमा समस्या आएकोले प्रदेश ५ बाँकेको भेरी अञचल अस्पतालमा डोल्पाको स्वाब परीक्षण हुने प्रमुख जिल्ला अधिकारी सुरेस सुनारले जानकारी दिए ।
'जिल्लामा पहिलो पटक कोरोना पोजिटिभ भएको र ठुलो संख्यामा नागरिकको स्वाब संकलन गरिएको छ तर दुईदिन हुन लाग्दासमेत परीक्षण हुने ठाउँसम्म पुगेको छैन जिल्लाकै मन्त्री र माननीय भएको के काम', नागरिक समाज डोल्पाका अध्यक्ष शेरबहादुर बुढाले आक्रोस ब्यक्त गरे । पीसीआरको रिपोट ढिला आउने भएपछि नागरिकहरु झनै अन्यौलमा रहेका छन् । प्रदेश सरकारले कुनै चासो नदिएको भन्दै नागरिकले विरोध गरिरहेका छन् । पीसीआरको रिपोट छिटो आएको खण्डमा नागरिकले ढुक्कसँग बस्न पाउने र थप सजग हुन सक्ने नागरिक समाज डोल्पाका अध्यक्षको दावी छ ।
प्रतिक्रिया दिनुहोस !
