नश्लवादी श्वेत आतंकको
जब जर्ज फ्लोयडहरू मारिन्छन्
दक्षिणपन्थी धर्मभीरु अतिवादीहरू
पुँजीवादसँग साँठगाँठ गर्दै
मैमत्त भएर
आफ्ना विषालु नंग्राले
गरिब, सीमान्त जनलाई चिथोर्छन्
एक प्रकारको भैँचालोले
मेरो मन-मस्तिष्क हल्लिन्छ
म आन्दोलित हुन्छु।
भोकको कहरले
तड्पिएर मर्ने
सूर्यबहादुर तामाङ
जोद्धी गोडिया
मलर सदाहरू
तिम्रा क्वारेन्टिनरूपी मृत्युशालामा
उपचार नपाएर
छटपटाई प्राण त्याग गर्ने
राजु सदाहरू कति होलान् ?
अनि,
यातनागृह बनेका
तिम्रा हिरासतका कर्तुतहरू !
उफ् !
अहिलेसम्म
प्रेमको बदला मृत्यु दिने
तिम्रो जात अहंकारले
कैयौँ अजित अनि
नवराजहरूको हत्या गरेको छ
हुर्किनै नपाउँदै
उन्मत्त हिंस्रक यौन पिपासुहरूले
बलात्कार गरेर झुण्ड्याइएका
अंगीराहरू कति होलान् ?
तिम्रा कथित समाजवादी खोलभित्रका
हत्या शृंखलाहरूले
यतिबेला,
शरीरका नसा तातिएका छन्
मनको उद्वेगले
मथिंगल घुमेको छ
त्यसैले,
मेरा प्रियजनहरूको हत्यामा
म शोक धुनमात्रै बजाउनेछैन
म निदाउने पनि छैन
बरु,
शरीरमा एक मुठी सास रहुन्जेल
न्यायका निम्ति
तिम्रो जात-सत्ताविरुद्ध
र,
अझै पनि
यो गोल भूगोलमा
मान्छे हुन नसकेका
लाखौँ-करोडौँ
(अ)मान्छेहरूका निम्ति
म आन्दोलनको मैदानमा छु
संघर्षको अग्र मोर्चामा छु
किनकि,
तिम्रो हजारौँ वर्षको उत्पीडनले
मलाई प्रतिरोधी बनाएको छ।
त्यसैले,
हे मनु बाजे !
तिमीले रोपेको वर्ण विद्वेष
र,
त्यसको जगमा ठडिएको
वर्गभेदको पर्खालले
जबसम्म,
मेरो जिजीविषालाई
हरपल लखेट्न छाड्नेछैन
मेरो सपनामा
जबसम्म,
अरिंगालहरू
घात लगाउन आइरहनेछन्
तबसम्म,
मलाई संयमित बन्न उपदेश दिने
ओ मनुका दासहरू हो !
यो धर्ती
यो आकाशमा
मेरो बराबरी हक खोज्न
पुर्खामाथिको अत्याचारको बदलामा
अक्षरको हतियारमा धार लाउँदै छु
तिम्रो जात-सर्वोच्चतालाई
अब सहिन्न
दलनको जञ्जीर चुँडालिन्छ
किनकि,
म मान्छे हुन चाहन्छु
छुवाछूतमुक्त मानवबस्ती चाहन्छु
अविभेदी पृथ्वी चाहन्छु
त्यसैले, होसियार होऊ
नश्लीय जात-सत्ताका ठेकेदाहरू हो !
तिम्रो झुटका पुलिन्दा खुल्दै छन्
मैले चाहेको पृथ्वीका निम्ति
हजारौँ-हजार आन्दोलित मनहरू
तिम्रो जात-विरासतविरुद्ध
लामबद्ध भइसकेका छन्।
प्रतिक्रिया दिनुहोस !
