बुटवल : विप्लव नेतृत्वको नेपाल कम्युनिष्ट पार्टीको जनअदालत रुपन्देहीले देवदह नगरपालिकाका मेयर हिराबहादुर खत्रीलाई आफ्नो निवास छाड्न ‘धम्कीपूर्ण’ पत्र दिएको छ । जनअदालतमा परेका मुद्धामा खत्री दोषी सावित भएको भन्दै जनअदालतले १० दिनभित्र देवदह नगरपालिका वडा नम्बर १०, भलुहीचोकमा रहेको घर खाली गर्न निर्देशन दिएको हो ।
जनअदालत रुपन्देहीका प्रमुख कमलमणिद्वारा हस्ताक्षरित सूचनामा अदालतको निर्देशन अवज्ञा गरे जिल्ला जनपरिषद्को नीति अनुसार कारवाही हुने चेतावनी दिइएको छ । तत्कालीन जनयुद्धताका देवदह नगरपालिका वडा नम्बर ३ मा रहेको १० बिगाहा ९ कठ्ठा जमिन भूमिहिनलाई दिइएकोमा मेयर खत्रीलेले उनीहरुको उठिवास बनाउने गरी जमिन खोसेको आरोप जनअदालतले पुष्टि गरेको जनाइएको छ । कित्ता नम्बर १५७ नक्सा नम्बर ४ को उत्त जग्गा भूमिहीनकै अधिकार भएको नेपालले जारी गरेको विज्ञप्तीमा जनाइएको छ ।
देवदह नगरपालिकाले सो जग्गा असार १ गते भत्काएको थियो । त्यहा बस्दै आएका ३५ परिवारले सो जमिनमा खेती लगाउँदै आएका थिए । जनअदालतले मेयर खत्रीले विकास निर्माणमा भ्रष्टाचार, नदीजन्य पदार्थको दोहन, सार्वजनिक बनको तस्करी र सार्वजनिक जग्गाको दुरुपयोग गरेको आरोप पुष्टि गरेको विज्ञप्तीमा उल्लेख गरिएको छ ।
नेकपा पार्टीमाथि दमन र सुराकी काम गरेको आरोपसमेत मेयरलाई लगाइएको छ । जनअदालतले असार १८ गतेदेखि १० दिनको म्याद दिएर घर खाली गर्न निर्देशन दिएको हो । मेयर खत्रीले सो पत्रको सूचना आफूले पनि पाएको बताए ।
प्रतिक्रिया दिनुहोस !
