बझाङ : बझाङमा शुक्रबार राती पहिरो जाँदा केदारस्यूँ गाउँपालिका ८ मल्लेस गाँउमा १७ घर पहिरोमा पुरिएका छन् भने ७ जनाको मृत्यु भएको छ। शनिबार बिहान स्थानीय र सुरक्षाकर्मीले पहिरोमा पुरिएका लास निकालेका छन् ।
आफ्नै घरभित्र पुरिएको अवस्थामा ४० वर्षीय राममती जेठारा, उनका छोरा ११ वर्षीय प्रयागराज र छोरी ७ वर्षीया अस्मिताको लास निकालेको घटना स्थलबाट प्रहरी असै रायभान सिंह एरीले बताए। उनका अनुसार ८० वर्षका दले जेठाराको पनि लास भेटिएको छ। पहिरोमा पुरिएका अन्य सन्तु जेठारा, गिरीजा जेठारा र लक्ष्मी जेठाराको खोजी कार्य भइरहेको उनले बताए।
पहिले १८ घरमा पूर्ण क्षति भएको छ। 'राती सुतेको अवस्थामा एकाएक पहिरो आउँदा बाँच्नै मुस्किल भयो', सुरेशले भने, 'सबै घरको धन सम्पती गाइ भैंसी बाख्रा पनि पुरिंदा गाँउ नै शोकमा छ। गाँउमाथि सामुदायिक वन पालेको थियो। यसरी पहिरो आउला भनरे सोचेकै थिएनौं।'
अहिले पनि गाउँमा पहिरो बग्न रोकिएको छैन। गाउँ जानलाई खोला तर्नु पर्ने भएकाले समस्या छ। यो गाँउमा ४० परिवारको बसोबास छ। यस घटनामा क्षति भएका पीडित परिवारलाई राहात दिनका लागि गृह मन्त्रालयसँग समन्वय भइरहेको प्रतिनिधिसभा सदस्य आशा विकले बताइन्। 'अहिले मृतकलाई निकाल्ने काम भइरहेको छ', प्रमुख जिल्ला अधिकारी कमलराज भण्डारीले भने, 'अरु क्षतिको विवरण लिन बाँकी छ।' 
प्रतिक्रिया दिनुहोस !
