परासी : नारायण नदीमा (गण्डक) पानीको बहाव बढेसँगै डुबानको जोखिम बढेको छ । पानीको बहाव बढेर खतरा नजिक पुगेपछि जिल्ला प्रशासन कार्यालय पश्चिम नवलपरासीले त्यस क्षेत्रका स्थानीयलाई सजग हुन आग्रह गरेको छ ।
शुक्रबार बिहान पानीको बहाव बढेर १० दशमलब ४५ मिटर पुगेको छ । ११ मिटरपछि उच्च खतरा मानिन्छ । जिल्ला आपतकालिन कार्य सञ्चालन केन्द्रमा रहेको मापन मिटरमा पानीको बहाव बढ्दै गएको देखाएको प्रमुख जिल्ला अधिकारी सागरमणि पाठकले बताए ।
गण्डक ब्यारेजमा सबै ढोका बन्द रहेकाले पानीको बहाव बढेदै गए नेपालतर्फ जोखिम बढ्ने भएकाले स्थानीयलाई सचेत हुन आग्रह गरिएको प्रजिअ पाठकले बताए । ब्यारेजको ढोका खोल्ने र बन्द गर्ने भारतीय पक्षले गर्दै आएको छ ।' पानीको बहाव बढ्दै गए ब्यारेजका ढोका खोल्न भारतीय पक्षसँग आग्रह गर्छौं, अहिले स्थानीयलाई सजग हुन र सुरक्षित स्थानको खोजीका लागि सरोकारवालासँग समन्वय गरिरहेका छौं,' प्रजिअ पाठकले भने ।
बिहीबार रातिदेखिको लगातार वर्षाले पानीको बहाव बढ्दै गएको छ । अझै ३÷४ घण्टा लगातार पानी परिरहे गण्डक क्षेत्र पूरै डुबानमा पर्ने जोखिम बढेको छ । समयमा सजगता अपनाउन नसके गण्डक क्षेत्रमा पर्ने सुस्ता, प्रतापपुर, सरावल र पाल्हीनन्दनका ४० बढी गाउँ डुबानमा पर्ने संभावना छ ।
भारतीय पक्षले हरेक वर्ष गण्डक नहरका बाँधहरु मर्मत गर्ने गरेको छ । तर गुणस्तरीय काम नहुँदा पानीको बहाव बढेसँगै बाँध फुट्ने खतरा पनि उत्तिकै रहेको स्थानीयले बताएका छन् ।
प्रतिक्रिया दिनुहोस !
