परासी : बाढीमा परेकालाई उद्दार गर्न प्रयोग हुने मोटरबोट चलाउन पश्चिम नवलपरासीका १२ जना सुरक्षाकर्मीलाई प्रशिक्षण दिइएको छ । विपद् पूर्वअभ्याससहित उनीहरुलाई प्रशिक्षण दिइएको हो । जिल्लामा बाढीको जोखिम बढी रहेका बेला गृहमन्त्रालयबाट जिल्ला प्रशासन कार्यालयलाई २ सेट मोटरबोट उपलब्ध गराइएको हो । मोटर बोट सेटमा १० ÷१० बटा ज्याकेट र हेलमेट छन् ।
मन्त्रालयले मोटरबोट पठाएपनि तालिम प्राप्त जनशक्ति नभएकाले सुरक्षाकर्मीहरुलाई मोटरबोट चलाउने बारे प्रशिक्षण दिइएको प्रमुख जिल्ला अधिकारी सागरमणि पाठकले बताए । नेपाली सेना, सशस्त्र प्रहरी र नेपाल प्रहरीका ४÷४ जनालाई प्रशिक्षण दिइएको हो । अहिले बाढीको जोखिम बढी रहेकाले तालिम प्राप्त सुरक्षाकर्मीसहित मोटरबोट तयारी अवस्थामा राखिएको प्रजिअ पाठकले बताए । मोटरबोट नहुँदा जिल्लाका विभिन्न स्थानमा बाढीमा फसेकालाई उद्दार गर्न कठिनाई हुँदै आएको थियो ।
यसैबीच बाढीका कारण सोमबारसम्म प्रतापपुर, सरावल र पाल्हीनन्दन गाउँपालिकाका १० घर परिवार विस्थापित भएका छन् । स्थानीय खोलाकाहरुका कारण विस्थापित भएकाहरुलाई गाउँपालिकाले खाना र स्कुलहरुमा बसोबासको व्यवस्था गरेको प्रजिअ पाठकले बताए ।
त्यसैगरी नारायणी नदी (गण्डक बाँधं) को सतह पनि बढ्दै गएको छ । सोमबार दिउँसोसम्म पानीको सतह १०.७५ मिटर पुगेको छ । ११ मिटर भन्दा बढी पानीको सतह पुगेपछि खतराको संकेत मानिन्छ । पानीको सतह बढ्ने संभावना रहेकाले त्यस क्षेत्रका स्थानीयलाई सजगता अपनाउन आग्रह गरिएको जिल्ला विपद् व्यवस्थापन समितिले जनाएको छ । नारायणी नदीसँगै स्थानीय झरही, खजुरा र धनेवा खोलाका कारण जिल्लाको दक्षिणभेग डुबानमा पर्दै आउने गरेको छ ।
प्रतिक्रिया दिनुहोस !
