दार्चुलामा पहिरो : दुईको मृत्यु, तीनजनाको उद्दार, महाकाली लोकमार्ग ठप्प

दार्चुला : जिल्लाको मालिकार्जुन गाउँपालिका ८ शंकरपुर पस्तीमा सोमबार राती घर माथिबाट खसेको पहिरोमा परी बेपत्ता दुईजनाको शव भेटिएको छ।बेपत्ता भएका अरुण दर्जी र मिलन दर्जीको शव मंगलबार भेटिएको प्रहरीले जनाएको छ। पहिरोमा परी ३५ वर्षीय लक्ष्मी ढोली, उनका ९ वर्षीय छोरा शुबम् परियारको जिवितै उद्धार गरिएको थियो। मृतक दुवैजना लक्ष्मी ढोलीका भाइ रहेको जनाइएको छ। 

उनीहरु लेकम गाउँपालिका ५ न का बासिन्दा रहेको प्रहरीले जनाएको छ । मंगलबार बिहान ३ बजेतिर माथिबाट पहिरो खस्दा घर आशिंक पुरिएको छ । घटनामा ढोलीकी छोरी सोनिया घरभित्रै अड्किएको अवस्थामा उद्धार गरिएको  थियो।

महाकाली लोकमार्ग अवरुद्ध

महाकाली लोकमार्गअन्र्तगतको गोकुलेश्वर दार्चुला सडक खण्डमा वर्षासँगै आएको पहिरोले ठाउँठाउँमा सडक अवरुद्व भएको छ । महाकाली लोक मार्गमा एकदर्जन बढी स्थानमा पहिरोसँगै ठूलाठूला ढुंगा खसेर मंगलबार बिहानैदेखि सडक अवरुद्ध भएको छ।

अविरल वर्षासँगै पहिरोले महाकाली नगरपालिका ३ डुङरेमा सडक अवरुद्ध भएपछि बिहानैदेखि सवारी आवागमन रोकिएको छ ।यसैगरी महाकाली लोकमार्गको महाकाली नगरपालिका वडा नम्बर ५ धौलीगाड खोलामा पहिरोले सडक अवरुद्ध भएको जिल्ला प्रहरी कार्यालय दार्चुलाका सूचना अधिकारी सुरेन्द्र जोशीले जानकारी दिए । 

विभिन्न ठाउँमा सडक अवरुद्ध जिल्ला भित्रिने र बाहिरीने सवारी साधन र यात्रु बीचबाटोमै अलपत्र परेका छन् ।   अवरुद्व सडक सूचारुका लागि महाकाली लोकमार्ग आयोजना कार्यालयले प्रयास जारी राखेको छ । 

ठूला ठूला ढुंगा र ठाउँ ठाउँमा पहिरो खसेका कारण सवारी आवागमन सूचारु हुन केही दिन लाग्ने जिल्ला प्रहरी कार्यालय दार्चुलाले जनाएको छ । 

शाखा सडकले पहिरो 

ठाउँठाउँमा जथाभावी रुपमा खनिएका शाखा सडकका कारणले पहिरो आएको हो।मापदण्ड विपरित बनाएका शाखा सडकले पहिरो गएको मालिकार्जुन गाउँपालिका २ का स्थानीय मानसिंह धामीले बताए ।