नवलपरासीमा बाढी र पहिरोमा परी दुईजनाको मृत्यु, १ बेपत्ता

नवलपुर : लगातार परेको वर्षाका कारण आएको बाढी-पहिरोले नवलपरासीमा दुईजनाको मृत्यु भएको छ भने १ जना बेपत्ता छन् । पूर्वी नवलपरासीको बुलिङटार गाउँपालिका-२ डाडाँझेरी गाउँको टाँडीमा सोमबार राती पहिरोले घर बगाउँदा एक दम्पत्तिको मृत्यु भएको छ ।

विकट पहाडि गाउँमा सोमबार राती गएको पहिरोले घर बगाउँदा ६१ वर्षीय शेरबहादुर नेपाली र उनकी ५७ वर्षीया श्रीमती खिलमायाको मृत्यु भएको जिल्ला प्रहरी कार्यालयका नायब उपरीक्षक प्रवक्ता मोहन खाँडले बताए ।

पहिरोमा परी बेपत्ता भएका दम्पत्तिको मंगलबार बिहान स्थानीय र प्रहरीको टोलीले खोजी गर्दा उनीहरु मृत अवस्थामा फेला परेका थिए । घरमा नेपाली दम्पत्ति मात्रै थिए । नजिकै रहेको अर्को घरमा छोरा बुहारी र नाती नातीनी सुतेकाले उनीहरु भने सकुशल रहेको गाउँपालिकाका अध्यक्ष शशिकिरण बस्ताँकोटीले बताए ।

हिउँदको समयमा बाटो खन्दा डोजर प्रयोग गरिने भएकाले पहाडि क्षेत्रका घर पहिरोको जोखिममा पर्ने गरेको स्थानीयले बताए।यसैबीच पहिरोका कारण पहाडि क्षेत्र जाने सडक अवरुद्ध भएका छन् । बुलिङटार र बौदिकाली गाउँपालिका जाने सबै मोटर बाटो अवरुद्ध भएको हो । 

पहाडि क्षेत्रमा खाद्यान्न ढुवानी र सर्वसाधरणको सुविधाका लागि राजमार्गको दलदलेबाट दैनिक रुपमा सवारीसाधनहरु आवतजावत गर्ने गरेका थिए । यता बाढीका कारण पश्चिम नवलपरासीको सुस्ता गाउँपालिका-४ थारुटोलाका ३२ वर्षीय सन्तु चौधरी नारायणीलाई नदीले बगाउँदा बेपत्ता भएका छन् । 

नदीमा बग्दै आएका दाउरा समात्न जाने क्रममा उनी डुबेर बेपत्ता भएको जिल्ला प्रहरी कार्यालयका नायब उपरीक्षक प्रवक्ता राजु लामाले जानकारी दिए । उनको खोजी कार्य भइरहेको प्रहरीले जनाएको  छ।