मर्स्याङ्‍दी पारी पहिरो जाँदा वारी दुई घर भत्किए, ३ जना घाइते

बेंसीसहर : लमजुङमा मस्र्याङ्दी नदी पारीपट्टि पहिरो जाँदा वारीपट्टि २ घर भत्किएका छन् । मस्र्याङ्दी गाउँपालिका-८ मा पर्ने सुरुङमार्गको भीरबाट चट्टान खस्दा वारिपट्टि वडा नं. ३ को छहरेखोलामा रहेका २ घर भत्किएका हुन् । ३ जना घाइते भएका छन् ।

ढिस्को खसेर मस्र्याङ्दी नदीमा परी उछिटिएर घर पुरेको गाउँपालिकाका उपाध्यक्ष होमबहादुर विकले बताए । बुधबार राति १२ बजेतिरको पहिरोका कारण घर पुरिँदा ४२ वर्षीया लालकौंरी तामाङ, उनका श्रीमान ५२ वर्षीय कुमबहादुर तामाङ र छिमेकी ७४ वर्षीय बलबहादुर थापा घाइते भएका छन् ।

लालकौंरीको दाहिने हात भाँच्चिएकाले उनलाई बेंसीसहरस्थित लमजुङ जिल्ला सामुदायिक अस्पतालले पोखरास्थित मणिपाल शिक्षण अस्पतालमा रिफर गरेको छ । कुमबहादुरको लमजुङ जिल्ला सामुदायिक अस्पतालमा उपचार गरिएको र बलबहादुरको स्थानीय मेडिकलमै उपचार गरिएको डीएसपी गंगाबहादुर थापाले बताए ।

गाउँपालिका अध्यक्ष अर्जुन गुरुङका अनुसार तामाङ र थापाको घर भत्किएको हो । उनका अनुसार बाढीपहिरोले वारिपट्टिको बाटो हुँदै मनाङ जाने सडकमा पनि क्षति पुर्‍याएको छ । पारिको पहिरोले वारीपट्टि क्षति पुर्‍याउँदा स्थानीय अचम्मित भएका छन् ।

बेसीसहर चामे सडकको विभिन्न स्थानमा पहिरो जाँदा र नदीनालामा बाढी आउँदा सवारी साधन सञ्चालनमा आउन सकेको छैन् ।