बैतडी : बैतडीमा प्रदेश गौरवको योजनाको रुपमा रहेको सतबाँझ-श्रीभावर-हाट-दार्चुला सडकको स्तरोन्नति गर्ने कार्य शनिबारदेखि सुरु भएको छ । प्रदेश गौरवको योजनाको रुपमा रहेको सो सडकको सतबाँझदेखि साढे ६ किलोमिटर र श्रीभावरदेखि हाट खण्डमा साढे ८ किलोमिटर कालोपत्रे गर्नका लागि ठेक्का सम्झौता भएर कामअघि बढेको पूर्वाधार विकास कार्यालयका प्रमुख जगतप्रसाद जोशीले जानकारी दिए ।
चन्द्रा एण्ड वसन्ता जेभी ग्वाल्लेक निर्माण कम्पनीले सो सडक कालोपत्रे गर्नका लागि ठेक्का सम्झौता गरेर काम अघि बढाएको जोशीले बताए । उनले भने, 'लकडाउनका कारण केही ढिलो गरेर सडक स्तरोन्नती गर्ने कार्य सुरु भएको छ । अब तोकिएकै समयमा सडक स्तरोन्नति कार्यले पूर्णता पाउने छ ।'
सतबाँझदेखि साढे ६ किलोमिटर स्तरोन्नति गर्नका लागि १२ करोडमा ठेक्का सम्झौता भएको छ भने श्रीभावरदेखि हाट खण्डमा साढे ८ किलोमिटर स्तरोन्नतिका लागि १७ करोडमा ठेक्का सम्झौता भएको छ । दुवै ठाउँबाट सडक स्तरोन्नति गर्ने कार्य सुरु भएको जोशीले बताए ।
अबको ३६ महिनामा काम सक्ने लक्ष्यसहित निर्माण कम्पनीसँग सम्झौता भएको छ । यो वर्ष पनि सो सडक स्तरोन्नतिका लागि प्रदेश सरकारले १० करोड बजेट विनियोजन गरेको जोशीले बताए ।
प्रदेश सरकारको गौरवको योजनाअन्तर्गतको सडक भएकाले सतबाँझ-श्रीभावर-हाट-दार्चुला सडक स्तरोन्नति गर्ने कार्य छिट्टै हुने समेत जोशीले दाबी गरे । सडक स्तरोन्नति गर्ने कार्यको उद्दघाटन गर्दै सुदूरपश्चिम प्रदेश सरकारका भौतिक पूर्वाधार मन्त्री पठानसिंह बोहराले विकास निर्माणका काममा ढिलासुस्ती नहुने दाबी गरे ।
उनले भने, 'हामीले प्रदेश गौरवका योजनालाई प्राथमिकतामा राखेर काम गरिरहेका छौं । यो वर्ष साउनदेखि नै प्रदेश सरकारले विकास निर्माणका कामहरु सुरु गरिसकेकाले समयमै काम सम्पन्न हुनेछन् ।अब असारमा मात्रै विकास निर्माण हुने परीपाटीको अन्त्य हुनेछ ।'
प्रदेश गौरवको योजनाअन्तर्गत सतबाँझ- श्रीभावर- हाट सडकको स्तरोन्नति गर्ने कार्य सुरु भएपछि यो सडकले नागरिकको जीवनस्तर सुधारमा टेवा पुर्याउने सुर्नया गाउँपालिकाका अध्यक्ष बीरबहादुर बिष्टले बताए । उनले भने, 'सडक पूर्वाधारको मेरुदण्ड हो । सडक निर्माण भएपछि ग्रामीण अर्थतन्त्रमा सुधार आउनेछ ।'
प्रतिक्रिया दिनुहोस !
