बेनी : म्याग्दीको धवलागिरी गाउँपालिका-६ मराङमा श्रम शिविर चलाएर पहिरो पीडितका लागि आश्रयस्थल (टहरा) निर्माण भएको छ । नेपाल कम्युनिस्ट पार्टी (नेकपा) सम्बद्ध राष्ट्रिय युवा संघ र अनेरास्ववीयु म्याग्दीले पहिरोबाट घरबास गुमाएका र जोखिममा परेकाको अस्थायी बसोबासका लागि ५१ वटा टहरा बनाएका हुन् ।
६५ परिवारको बसोबासका लागि बेसीमा ११, ठूलोगाउँमा ८, राम्चेमा १५ र कुम्रिमा १७ वटा टहरा बनाएको राष्ट्रिय युवा संघ म्याग्दीका सहसंयोजक सन्दिप खत्रीले जानकारी दिए । ४० जना युवा र विद्यार्थीको साथमा स्थानीय डाफे युवा क्लवका सदस्यले पाँच दिन काम गरेका थिए ।
घण्टीवाङ र रिखका पहिरो पीडित बसेको आरवाङको जनविकास आधारभूत विद्यालयमा दुईवटा अस्थायी शौचालय र सेफ्टी ट्याङ्की बनाएका छन् । टहरा बनाउनका लागि बाँस र काठ संकलन गर्ने तथा व्यवस्थापनको काम गरेको राष्ट्रिय युवा संघका जिल्ला संयोजक प्रविन शाहीले बताए ।
'केही टहरामा त्रिपालले छाइएको छ । जस्तापाताले छाउन मिल्नेगरी टहराको संरचना बनाइएका छौं, उनले भने, 'जस्तापाटा ढुवानी भएपछि छाउने गरी तयार बनाएर आयौं।'
मराङको कल्लेनी, राम्चे, ठूलोगाउँ, कुम्रि र रिखमा पहिरोमा परी १९ जनाको मृत्यु भएको थियो । दुईजना अझै वेपत्ता भएका छन् । पहिरोले १७ घरमा पूर्ण, १५ घरमा आंशिक क्षति र ७८ घर पहिरोको उच्च जोखिममा छन् । सडक र घोरेटो बाटो समेत अवरुद्ध बनेकाले जनजीवन कष्टकर बनेको छ ।
प्रतिक्रिया दिनुहोस !
