बुटवल : गुल्मीको रूरू गाउँपालिका– ५ आरिपाटामा पहिरोले घर पुरिँदा चार जनाको ज्यान गएको छ । शुक्रबार राति ८ बजेतिर खसेको पहिराले बिना माझीको घर पुरेको हो ।
पहिरोले घर पुरिँदा माझीसहित उनका तीन सन्तानको ज्यान गएको हो। डेढ वर्षीयादेखि अन्दाजी ७ वर्षका तीन छोराछोरीको मृत्यु भएको स्थानीय मेघराज गिरीले जानकारी दिए।
मृतकको शव स्थानीयले निकालेका छन् । प्रहरीको टोली आउँदै रहेको उनले बताए । पहिरोका कारण अन्य तीन घरका बासिन्दा विस्थापित भएका छन् ।
सो गाउँमा २० घर रहेका छन् । रातिको समय भएकाले पहिरो कति ठूलो गएको हो आकलन गर्न सकिएको छैन ।
प्रतिक्रिया दिनुहोस !
