भक्तपुर : स्कुटरको ठक्करबाट भक्तपुरमा एक महिलाको ज्यान गएको छ । महानगरीय प्रहरी परिसर भक्तपुरका अनुसार स्कुटरको ठक्करबाट घाइते भएकी भक्तपुर नगरपालिका ६ भोलाछें निवासी ४१ वर्षीया सुन्दरी सुवालको बिहीबार बिहान मृत्यु भएको हो ।
भक्तपुर नपा १० वन्तीस्थित चागुँनारायण सडकमा पैदल हिँडिरहेकी सुन्दरीलाई बुधबार दिउँसो प्रदेश ३–०२–० १५ प ७२६५ नम्बरको स्कुटरले ठक्कर दिएको थियो ।
महानगरीय प्रहरी परिसर भक्तपुरका अनुसार चागुँनारायण नपा ५ छालिङ बस्ने २२ वर्षीय आशीष कार्कीले चलाउँदै गरेको स्कुटरको ठक्करबाट घाइते सुन्दरीलाई तत्काल उपचारको लागि भक्तपुर अस्पताल पुर्याइएको थियो ।
भक्तपुरमा प्रारम्भिक उपचारपछि बुधबार साँझ काठमाडौंस्थित ट्रमा सेन्टर पठाइएको परिसरका प्रवक्ता प्रहरी नायब उपरीक्षक दीपक गिरीले जानकारी दिए ।
उनका अनुसार ट्रमा सेन्टरले थप उपचारका लागि दिन बाँसबारीस्थित न्यूरो अस्पताल रिफर गरेको थियो । न्यूरो अस्पतालमा उपचारकै क्रममा बिहीबार बिहान घाइते सुन्दरीको मृत्यु भएको जानकारी आएको प्रहरी नायब उपरीक्षक गिरीले बताए ।
घाइतेको मृत्युपछि स्कुटर चालक कार्कीलाई नियन्त्रणमा लिइ थप अनुसन्धान कार्य अघि बढाइएको भक्तपुर प्रहरीले जनाएको छ ।
प्रतिक्रिया दिनुहोस !
