बैतडी : बैतडीमा कोरोना संक्रमण पुष्टि भएका नागरिकका आफन्तको स्वाब संकलन गरेर कोरोना परीक्षण सुरु गरिएको छ । समुदायमा कोरोना फैलिएको नफैलिएको बारेमा जानकारी लिनका लागि संक्रमितका आफन्तको स्वाब संकलन गरेर कोरोना परीक्षण सुरु गरिएको स्वास्थ्य कार्यालयका प्रमुख योगेशप्रसाद भट्टले बताए ।
उनले भने, 'हामीले समुदायमा कोरोनाको अवस्था के छ भनेर संक्रमितका आफन्तहरुको स्वाब संकलन गरेर कोरोना परीक्षण थालेका छौं ।' यसैक्रममा पाटनका ४६ जनाको स्वाब संकलन गरेर परीक्षण गरिएकोमा सबैको रिपोट नेगेटिभ आएको छ ।संक्रमितका सम्पर्कमा रहेका कम्तीमा २ जना आफन्तको स्वाब संकलन गरेर कोरोना परीक्षणका लागि डडेल्धुरा पठाउने कार्य भइरहेको स्वास्थ्य प्रमुख भट्टले बताए ।
पाटन नगरपालिकाले ४६ जनाको स्वाब संकलन गरेको सबैको रिपोट नेगेटिभ आएको पाटन नगरपालिकाका स्वास्थ्य शाखा प्रमुख मदनसिंह महराले बताए ।उनले भने, 'हामीले संक्रमितका आफन्तहरुको स्वाब संकलन गरेर पठाएका थियौं । सबैको रिपोट नेगेटिभ आएको छ । यसले समुदायमा संक्रमण फैलिएको छैन भन्ने पुष्टि भएको छ ।'
जिल्लाका अन्य स्थानीय तहहरुमा पनि संक्रमितका आफन्तहरुको स्वाब संकलन कार्य भईरहेको स्वास्थ्य कार्यालयका प्रमुख योगेशप्रसाद भट्टले बताए । उनले भने, 'केही ठाउँमा स्वाब संकलन भएर प्रयोगशालामा पठाइसकिएको छ । केही ठाउँमा स्वाब संकलनको काम भइरहेको छ ।'
प्रदेश स्वास्थ्य निर्देशनालयको निर्देशन अनुसार संक्रमितका आफन्तको स्वाब संकलन गर्ने कार्य सुरु भएको हो । यसले समुदायमा कोरोना संक्रमणको अवस्थाका विषयमा थाहा हुने बताइएको छ ।
प्रतिक्रिया दिनुहोस !
