दोलखामा बाढी-पहिरोबाट एकको मृत्यु, ११ परिवार विस्थापित
साउन २३, २०७७ शुक्रबार १७:३:०
दोलखा : बिहीबार राती परेको वर्षाको कारण आएको पहिरोमा परी उत्तरी दोलखाको गौरीशंकर गाउँपालिका-८, खारे टुनीटारमा ग्रील मजदुरको मृत्यु भएको छ । मृत्यु हुनेमा कालिञ्चोक गाउँपालिका-८ सुनखानीका २८ वर्षीय सुरेश शिवाकोटी रहेको दोलखाका प्रमुख जिल्ला अधिकारी भीमकान्त शर्माले जानकारी दिए ।
मृतक शिवाकोटी सिंगटीबाट टुनिटारको नवनिर्मित घरमा बास बसिरहेको बेला पहिरोले पुरेर मृत्यु भएको स्थानीय बद्री खड्काले जानकारी दिए । मृतक शिवाकोटीको शव उत्खनन गरेर प्राथमिक स्वास्थ्य केन्द्र चरिकोटमा पोष्टमार्टमका लागि लगिएको प्रजिअ शर्माले बताए ।
पहिरोमा परेर जाजरकोट ठेडागाड नगरपालिका-९ का २० वर्षीय लोकेन्द्र चौधरीको हात भाँचिएको र उनको उपचार भइरहेको दोलखाका प्रहरी प्रमुख डीएसपी रेवतीरमण पोखरेलले बताए ।
पहिरोको कारण गौरीशंकर गाउँपालिका-५, ६ र ८ गरी ३ वटा वडाका ५४ जना पूर्णरुपमा विस्थापित भएका छन् भने ६ घरमा पूर्ण क्षति पुगेको छ। पहिरोले एउटा मोटरसाइकल बगाउनुको साथै ४३ चौपाया मरेको प्रहरीले जनाएको छ ।
गौरीशंकर गाउँपालिका-६, गुरुम्फी क्षेत्रमा सुरीखोलाबाट आएको बाढी बजारमा छिर्दा एक स्वास्थ्यचौकीसहित १० वटा घरमा क्षति पुर्याएको प्रहरीले जनाएको छ । तामाकोसी नदीको सतहले निर्धारित तटीय क्षेत्रभन्दा माथि छोएपछि बिहीबार राति १० बजेतिर जल तथा मौसम विज्ञान विभागले एसएमएसमार्फत जानकारी गराउँदै स्थानीयलाई सचेत रहन आग्रह गरेको थियो ।
गौरीशंकर गाउँपालिका प्रवेश गर्ने भोर्लेस्थित बेलिव्रिज जोखिममा परेको गौरीशंकर गाउँपालिकाका अध्यक्ष सोयमबहादुर खड्काले बताए । पालिकाको करिब सयमिटर मुख्य सडक बाढीले बगाएपछि सुरी, खारे, चंखु र मार्बु जाने यातायात अवरुद्ध भएको छ । बाढीले ६ दशमलव ४ मेगावाटको सुरीखोला हाइड्रोपावर, ११ दशमलव ६ मेगावाटको तल्लो खानीखोला र ५ मेगावाटको घट्टेखोला जलविद्युत् आयोजनमा समेत क्षति पुगेको छ ।
प्रतिक्रिया दिनुहोस !
