दोलखा : उत्तरी दोलखाको गौरीशंकर गाउँपालिकाको दुईजनालाई कोरोना संक्रमण देखिएको छ । तेस्रो मुलुकबाट आएर क्वारेन्टाइनमा रहेको एक र गाउँपालिकाका एक कर्मचारी गरी दुई पुरुषमा कोरोना संक्रमण देखिएको हो ।
संक्रमितसहित ७ जनाको स्वाब साउन २५ गते परीक्षणका लागि धुलिखेल अस्पतालमा पठाइएकोमा दुईजनाको रिपोर्ट पोजेटिभ आएको स्वास्थ्य कार्यालय दोलखाका प्रमुख विभुकुमार झाले बताए । गौरीशंकर गाउँपालिकाका नवनियुक्त कर्मचारीमा कोरोना संक्रमण देखिएको एक कर्मचारीले जानकारी दिए ।
तेस्रो मुलुकबाट आएका ती संक्रमित क्वारेन्टाइनमै रहेको र कर्मचारी पनि पनि गाउँपालिकाको आवासमै आइसोलेसनमा रहेको बताइएको छ । यसअघि पनि सोही गाउँपालिकाकै दुईजनमा कोरोना संक्रमण देखिएको थियो । हालसम्म जिल्लाका ४२४ जनाको पीसीआर परीक्षण गर्दा ६ जनामा कोरोना संक्रमण देखिएको छ जसमध्ये एकजनाको मृत्यु भएको छ भने ४ जना निको भएर घर फर्केको स्वास्थ्य कार्यालयको तथ्यांक छ।
प्रतिक्रिया दिनुहोस !
