समुदायमा कोरोना देखिएपछि लमजुङको सुन्दरबजारमा निषेधाज्ञा
साउन ३०, २०७७ शुक्रबार १६:५०:०
बेंसीसहर : समुदायमा कोरोना भाइरस (कोभिड-१९)संक्रमण देखिएपछि लमजुङको सुन्दरबजार नगरपालिकाका ५ वटा वडामा निषेधाज्ञा जारी गरिएको छ । सुन्दरबजार नगरपालिका ७ का ३२ वर्षीय एक पुरुषमा कोरोना सङ्क्रमण पुष्टि भएसँगै जिल्ला कोभिड-१९ सङ्कट व्यवस्थापन केन्द्रको शुक्रबार बसेको बैठकले यस्तो निर्णय गरेको हो ।
सुन्दरबजार नगरपालिकाका वडा नम्बर ५, ६, ७, ८ र ९ मा अर्का सूचना नआएसम्मका लागि निषेधाज्ञा जारी गरिएको प्रमुख जिल्ला अधिकारी कृष्णप्रसाद शर्माले जानकारी दिए ।जिल्ला कोभिड-१९ सङ्कट व्यवस्थापन केन्द्रको निर्णयअनुसार निषेधाज्ञा जारी गरिएका वडामा औषधि उपचार, खाद्य वस्तु खरिद, आफ्नै खेतबारीमा कृषिजन्य कार्य गर्नेजस्ता आवश्यक काममा बाहेक कुनै पनि व्यक्ति घरबाहिर निस्कन रोक लगाइएको छ ।
एम्बुलेन्स, बिरामी बोकेका गाडी, खाद्य वस्तु, तरकारी, दूध, खानेपानी, पेट्रोलियम पदार्थ बोक्ने गाडी, शव वाहन, फोहोर व्यवस्थापन गर्ने गाडी, पशुपंक्षीका दाना बोक्ने गाडी, सञ्चारकर्मी, स्वास्थ्यकर्मी तथा सुरक्षा निकायले प्रयोग गर्ने साधन र अनुमति प्राप्त साधन बाहेक कुनै प्रकारका सार्वजनिक वा निजी यात्रु तथा मालवाहक सवारी साधन (मोटरसाइकल समेत) सञ्चालन गर्न रोक लगाइएको छ ।
यस्तै अत्यावश्यक उपभोग्य वस्तु बिक्री गर्ने खाद्यान्न तथा तरकारी पसल, पेट्रोल पम्प, ग्याँस डिपो, औषधी पसल बाहेक सम्पूर्ण पसल, उद्योग व्यवसाय सञ्चालन गर्न रोक लगाइएको छ । तर खाद्यान्न तथा तरकारी पसल बिहान ६ बजेदेखि ९ बजेसम्म मात्र खोल्न पाइने सहायक प्रमुख जिल्ला अधिकारी काजीमान सुनारले जानकारी दिए ।
स्वास्थ्य संस्था र अत्यावश्यक सेवाका कार्यालय बाहेक बैंक वित्तीय संस्था सहकारीसहित सबै सरकारी, निजी तथा गैरसरकारी क्षेत्रका कार्यालयबाट प्रदान हुने नियमित सेवा सञ्चालन गर्न रोक लगाइएको छ ।
धार्मिक, साँस्कृतिक सामाजिक (विवाह, व्रतबन्ध) लगायत कुनै प्रकारका जमघट तथा भेला हुने सबै प्रकारका क्रियाकलापहरु जिल्लाभर नै सञ्चालन गर्न पनि रोक लगाइएको छ । जिल्लाका सबै नाकाहरुमा उल्लेखित अत्यावश्यक सेवाका सवारी साधन, एम्बुलेन्स, जिल्ला प्रशासन कार्यालयबाट अनुमति प्राप्त सवारी साधनबाहेक सम्पूर्ण सवारीसाधन र पैदल आवतजावतमा पूर्ण रोक लगाइएको छ । आदेशको पालना नगरेमा प्रचलित कानुन बमोजिम कारबाही गरिने जिल्ला प्रशासन कार्यालय, लमजुङले जनाएको छ ।
लमजुङमा हालसम्म १ सय १२ जनामा कोरना संक्रमण देखिएकोमा १ सय ९ जना निको भएर घर फर्किएका छन भने ३ जनाको आइसोलेसनमा उपचार भइरहेको छ ।
प्रतिक्रिया दिनुहोस !
