दोलखा : उत्तरी दोलखाको गौरीशंकर गाउँपालिकाको दुईजनालाई कोरोना संक्रमण भएपछि गरिएको कन्ट्रयाक ट्रेसिङले थप ५ जनामा कोरोना संक्रमण देखिएको छ । दुईजनाको सम्पर्कमा पुगेका ८३ जनाको स्वाब संकलन गरी धुलिखेल अस्पतालमा परीक्षण गर्दा एकमहिला र ४ पुरुष गरी ५ जनामा कोरोना संक्रमण देखिएको स्वास्थ्य कार्यालय दोलखाका प्रमुख विभुकुमार झाले जानकारी दिए ।
काठमाडौंमा परीक्षण गरेका गाउँपालिका अध्यक्ष र धुलिखेल अस्पतालमा परीक्षण गरिएको उपाध्यक्षलाई भने संक्रमण नदेखिएको स्रोतले जनाएको छ ।स्रोतको अनुसार गाउँपालिकाका तीन सवारी चालकमध्ये एकजनामा कोरोना संक्रमण देखिएको छ ।
गाउँपालिकाका कर्मचारी २ जना, स्थानीय एकजना, गाउँपालिकाका सहयोगी सेवाप्रदायक संस्थाका एकजनालाई संक्रमण भएको स्रोतले जनाएको छ । तेस्रो मुलुकबाट आएर क्वारेन्टाइनमा रहेका एक र गाउँपालिकाका एक कर्मचारी गरी दुई पुरुषमा मंगलबार कोरोना संक्रमण देखिएको थियो ।
तेस्रो मुलुकबाट आएका ति संक्रमित क्वारेन्टाइनमै रहेको र कर्मचारी पनि गाउँपालिकाको आवासमै आईसोलेसनमा रहेको बताईएको छ । यसअघि पनि सोही गाउँपालिकाकै दुईजनमा कोरोना संक्रमण देखिएको थियो ।
हालसम्म जिल्लाका ४२४ जनाको पीसीआर परीक्षण गर्दा ११ जनामा कोरोना संक्रमण देखिएको छ भने ३ जना निको भएर घर फर्केको स्वास्थ्य कार्यालयको तथ्यांक छ ।
प्रतिक्रिया दिनुहोस !
