परासी : पश्चिम नवलपरासीको सदरमुकाम परासी बजार कोरोना संक्रमणको उच्च जोखिममा रहेको छ । समुदायस्तरमा गरिएको पीसीआर परीक्षणमा संक्रमितको संख्या बढ्दै गएपछि रामग्राम नगरपालिका क्षेत्रको सदरमुकाम परासी बजार उच्च जोखिममा रहेको हो ।
संक्रमितमध्ये नगर क्षेत्रका ५ जनामध्ये ३ जनामा लक्षणसहितको कोरोना संक्रमण देखिएको छ । लक्षण देखिएका तीनै जना राजनीतिक दलका नेताहरु हुन् । लक्षणदेखिएकामा पूर्वमन्त्री समेत छन् । उनीहरुमध्ये एकजनाको बुटवल र दुईजनाको काठमाडौं र ललितपुरका अस्पतालमा उपचार भइरहेको छ ।
राजनीतिक दलका नेताहरुमा लक्षणसहितको कोरोना पुष्टि भएपछि धेरैजना उनीहरुको सम्पर्कमा आएका कारण पनि परासी बजार क्षेत्र उच्च जोखिममा रहेको हो । नेताहरुको सम्पर्कमा आएकामध्ये केही होम क्वारेन्टाइनमै छन् । तर अधिकांश भने निर्वाध रुपमा हिँडडुल गर्ने गरेको पाइएको छ ।
जिल्लामा हालसम्म १ सय ३९ जना मा पोजिटिभि देखिएको छ । जसमा समुदायस्तरको परीक्षणमा १४ जनामा कोरोना पोजिटिभ देखिएको स्वास्थ्य कार्यालयका प्रमुख गौरव ढकालले जानकारी दिए । समुदायस्तरमा कोरोना संक्रमण फैलिएपछि परीक्षण कार्यलाई बढाइएको ढकालले बताए ।
समुदायस्तरको परीक्षणका क्रममा रामग्राम नगरपालिकाका दुई कर्मचारी, एक जनप्रतिनिधि र सर्वसाधारणमा कोरोना पोजिटिभ देखिएको छ । त्यसैगरी सुस्ता गाउँपालिकाको नर्सही स्वास्थ्य चौकीमा कार्यरत एक अनमिमा समेत कोरोना पोजिटिभ देखिएको छ । कर्मचारीमा कोरोना संक्रमण देखिएपछि नगरपालिका र स्वास्थ्य चौकी शिल गरिएको छ ।
त्यसैगरी समुदायस्तरमा कोरोना संक्रमण बढेपछि जिल्ला प्रशासन कार्यालयले आज (साउन ३२ ) देखि बिहानदेखि भदौ ६ गतेसम्म जिल्लाभर निषेधाज्ञा जारी गरेको छ । निषेधाज्ञामा सरकारी कार्यालय, बैंक तथा वित्तिय संस्थाका सेवा बन्द गरिएको छ । सबै पालिकाहरुले पनि सूचना निकालेर भदौ ६ गतेसम्मका लागि पसल, व्यवसाय र अत्यावश्यक सवारी साधन र सर्वसाधारणको आवतजावतमा रोक लगाएका छन् । जिल्ला प्रशासन र पालिकाहरुको सूचनाका कारण सर्वसाधारणको आवतजावतदेखि सबै क्षेत्र बन्द छन् ।
प्रतिक्रिया दिनुहोस !
