काठमाडौं : ‘म कति समय बाँच्छु भनेर प्रश्न गरिरहन्थें । डाक्टरहरू मौन बस्थे । जब उनीहरू जवाफविहीन हुन्थे, मलाई निकै डर लाग्थ्यो । मृत्यु नजिकै आइसक्यो जस्तो लाग्थ्यो । त्यो बेला मेरो बुझाइअनुसारको क्यान्सर भनेको ‘मेन्टल्ली डेथ’ थियो । क्यान्सर लाग्नु भनेको जीवन सकिनु हैन भनेर बुझ्न मलाई लामो समय लाग्यो ।’ आठ वर्षअघि पाठेघरको क्यान्सरसँग साक्षात्कार गरेकी बलिउड नायिका मनीषा कोइराला हाल बोनसको जिन्दगी बाँचिरहेकी छन् । भन्छिन्,
‘क्यान्सरले मलाई पुनर्जन्म दियो ।’
मनीषाले आत्मबल गुमाइनन् । उनको दृढ आत्मविश्वास, इच्छाशक्तिले नै क्यान्सरलाई परास्त गर्न सकिन् । र, त यही आइतबार ५०औं जन्मोत्सव मनाउने मौका पाइन् । सन् १९७० अगस्ट १६ मा जन्मिएकी मनीषा जिन्दगीको आधा शतक समय पार गरिन् ।
मनीषा कोइराला आफैंमा पूर्ण परिचय हो । जो नेपालमा जन्मिएर बलिउडमा स्थापित भइन् । सन् १९९१ मा अभिनेता विवेक मु श्रानसँग जोडी बाँधेको ‘सौदागर’ फिल्मबाट बलिउडमा डेब्यु गरेकी थिइन् मनीषाले । उनको डेब्यु फिल्म ‘सौदागर’ निकै चर्चामा रह्यो । त्यस सफलताले उनलाई लगातार फिल्म दिलायो । ६ दर्जनभन्दा बढी फिल्ममा अभिनय गरेकी मनीषा बलिउड छिर्नुअघि नेपाली फिल्म ‘फेरि भेटौला’मा पनि खेलेकी थिइन् । तर यो फिल्म राम्रो चलेन ।
मृत्युलाई निकै नजिकबाट अनुभव गरेकी मनीषा अहिले अरूलाई हौसला दिँदै हिँड्छिन् । क्यान्सरलाई कसरी जित्ने स्वास्थ्य सन्देश बाँडिरहेकी हुन्छिन् । यसै साता बलिउड नायक सञ्जय दत्त क्यान्सरपीडित भए । सञ्जयलाई हौसल बढाउँदै मनीषाको अग्रिम शुभकामना थियो, ‘तिमी क्यान्सरलाई जरुर पराजित गर्छौ सञ्जय ।’ उनले आफ्नो मृत्यु अनुभवलाई अंग्रेजी भाषाको पुस्तक ‘हिल्ड’मा पोखेकी छन् ।
रिल लाइफमा निकै चमकधमक र रंगरमाइलो जिन्दगी बाँचेकी मनीषाले जिन्दगीलाई खासै फर्केर हेर्नु परेको थिएन् । क्यान्सर लागेपछि नै उनले खास जिन्दगी बुझिन् । क्यान्सरलाई मृत्युसँग लड्ने अवसरका रूपमा ग्रहण गरिन् ।
एक दशकअघि व्यवसायी सम्राट दाहालसँग वैवाहिक सम्बन्धमा जोडिएकी मनीषाको दाम्पत्य रथ भने लामो समय गुड्न सकेन । विवाह टुट्नु, क्यान्सर लाग्नु र अभिनयबाट टाढिनु पर्दा उनले कठिन समय पार गरेकी थिइन् । जन्मदिनको ५०औं वर्षगाँठ मनाइरहँदा उनको आत्मविश्वास, जीवनप्रतिको सकारात्मक दृष्टिकोण भने अझ मौलाएर गएको देख्न सकिन्छ । पछिल्लो समय उनमा आध्यात्मिक झुकाव बढ्दै गएको छ ।
राष्ट्रप्रेम र मनीषा
जेठको पहिलो साता अभिनेत्री मनीषा कोइरालाले गरेको एक ट्विटका कारण विवादमा तानिएकी थिइन् । नेपाल–भारत सीमा विवादमा नेपालको पक्षमा ट्विट लेखेको भन्दै भारतीय ट्विटर प्रयोगकर्तादेखि सञ्चारमाध्यमले उनीविरुद्ध अनर्गल प्रचार गरे । परराष्ट्र मन्त्री प्रदीप ज्ञवालीले ‘लिम्पियाधुरा, लिपुलेक र कालापानीसहितका भूभाग समेट्दै ७ प्रदेश, ७७ जिल्ला र ७ सय ५३ स्थानीय तहको प्रशासनिक विभाजन खुल्ने गरी नेपालको नक्सा प्रकाशित गर्ने मन्त्रिपरिषद्को निर्णय’ भन्दै ट्विट गरेका थिए । सोही ट्विटलाई रिट्विट गर्दै मनीषाले विचार राखेकी थिइन्, ‘हाम्रो सानो राष्ट्रको गरिमा बढाएकोमा धन्यवाद । अब तीन महान् देशबीच शान्तिपूर्ण र सम्मानजनक वार्ताको आशा गर्दछु ।’
लगत्तै उक्त ट्विटमा मिश्रित प्रतिक्रिया आए । भारतीय टीभी च्यानल एबीपी न्युजले त उनको ट्विटलाई ‘भारतको नुन खाएर चीनको गीत गाउने ? ’ भन्ने आरोपसमेत लगायो । त्यसबेला सामाजिक सञ्जालमा आइएम विथ मनीषा ट्याग गरेर धेरैले उनको साथ दिए । उनले सो टिप्पणीको कडा ढंगले खण्डन गरिन्, ‘कला बेचेकी हुँ, स्वाभिमान होइन ।’
मनीषाकी आमा सुष्मा कोइरालाले गत वर्ष पोखरामा भएको लिट्रेचर फेस्टिभलमा मनीषालाई डाक्टर बनाउने इच्छा राखेको बताएकी थिइन् । ‘तर छोरी राम्रो कलाकारको रूपमा उदाएकोमा म गर्व गर्छु ।’ उनले प्रफुल्लित हुँदै भनेकी थिइन् ।
नेपाली कांग्रेसको महाधिवेशन संघारमा छ । बीपी कोइरालाकी नातिनी मनीषालाई भने राजनीतिमा रुचि छैन । सायद बुवा प्रकाश कोइरालालाई पनि राजनीतिमा असफल भएको उनले नजिकबाट नियालेकी छन् । उनको भनाइ छ, सबैले राजनीति नै गर्नुपर्छ भन्ने छैन । आआफ्नो क्षेत्रमा सबैले राम्रो गरौं । मनीषालाई जन्मदिनको ५०औं वर्षगाँठको शुभकामना ।
प्रतिक्रिया दिनुहोस !
