भैरहवा : रुपन्देही जिल्लामा दुई दिनमा कोरोना संक्रमणले थप तीनजनाको मृत्यु भएको छ । शनिबार एकजना र आइतबार दुईजनाको मृत्यु भएको स्वास्थ्य कार्यालय रुपन्देहीका भेक्टर कन्ट्रोल निरीक्षक केदारनाथ शाहले बताए । यससँगै रुपन्देहीमा मृतकको संख्या पाँच पुगेको छ ।
आइतबार मृत्यु हुनेमा बुटवल उपमहानगरपालिका १ की ६७ वर्षीया महिला र सम्मरीमाई गाउँपालिका २ मुडिलाका ३८ वर्षीय पुरुष छन् । त्यस्तै शनिबार मृत्यु हुनेमा रोहिणी गाउँपालिकाका ३ का ५३ वर्षीय पुरुष छन् ।
बुटवलकी ६७ वर्षीया मृतक महिलामा कोरोना संक्रमण पुष्टि भएपछि अस्पतालमा भर्ना भएको र आइतबार स्वास्थ्य अवस्था थप गम्भिर हुदै जादाँ उपचारको क्रममा मृत्यु भएको लुम्बिनी प्रादेशिक अस्पतालले प्रेस विज्ञप्ती जारी गरी जनाएको छ । अस्पतालका अनुसार मृतक महिलालालाई श्वासप्रश्वासमा समस्या, दिर्घ रोगी, प्रेसर र मृगौलाको समस्या थियो ।
यस्तै सम्मरीमाईका ५३ वर्षीय मृतक पुरुष श्वासप्रश्वासको समस्याले अस्पतालमा भर्ना भएको र उपचारको क्रममा दिउँसो मृत्यु भएको लुम्बिनी प्रादेशिक अस्पतालले जनाएको छ । मृतक दुवैजनाको कोरोना विशेष अस्थायी अस्पतालमा भेन्टिलेटरमा उपचार भइरहेको अवस्थामा मृत्यु भएको भेक्टर कन्ट्रोल निरीक्षक शाहले बताए ।
शनिवार मृत्यु भएको रोहिणीका ५३ वर्षीय पुरुषको स्वास्थ्यमा समस्या उत्पन्न भएपछि अस्पताल पुगेका थिए । तर, अस्पतालहरुमा बेड अभावपछि उनले निजी ल्याबमा स्वाब दिएर घर फर्किने क्रममा मृत्यु भएको र रिपोर्ट पोजिटिभ आएको उनले जानकारी दिए ।
मृत्यु पश्चात रिपोर्ट आएकोले कयौँ सर्वसाधरणहरु मृतकको मलामीमा सहभागी भएका थिए । मलामी सहभागी भएकाहरुलाई होम क्वारेन्टाइनमा बस्न आग्रह गरिएको र केही दिनमा ट्रेसिङ गर्ने स्वास्थ्य कार्यालय रुपन्देहीका भेक्टर कन्ट्रोल निरीक्षक शाहले बताए ।
प्रतिक्रिया दिनुहोस !
