म्याग्दीमा प्रहरी जवानमा कोरोना संक्रमण,संक्रमितको संख्या ४९

बेनी : म्याग्दीका एकजना प्रहरी जवानमा सोमबार कोरोना संक्रमण पुष्टि भएको छ । पोखरामा तालिम सकाएर बेनी आइ जिल्ला प्रहरी कार्यालयको क्वारेन्टिनमा बसेका २० वर्षका प्रहरीमा कोरोना संक्रमण पुष्टि भएको हो । 

पोखरास्थित प्रयोगशालामा गरिएको स्वाब नमुनाको परिक्षणका क्रममा ती प्रहरीमा कोरोना संक्रमण पुष्टि भएको स्वास्थ्य कार्यालय म्याग्दीका निमित्त प्रमुख एकनारायण लम्सालले बताए । ती प्रहरी भदौ १ गते बेनी आएका थिए । उनीसहित ३१ जनाको भदौ ४ गते स्वाबको नमुना संकलन गरेर परिक्षणका लागि पोखरा पठाइएको थियो ।

संक्रमण पुष्टि भएका प्रहरीलाई बेनीको खुल्ला मञ्चस्थित शैक्षिक तालिम केन्द्रको भवनमा बेनी अस्पतालले सञ्चालन गरेको आइसोलेसनमा राखिएको छ । साउन ३१ गतेदेखि बेनीको आइसोलेसन खाली थियो । 

म्याग्दीमा हालसम्म ४९ जनामा कोरोना संक्रमण पुष्टि भएको छ । यसअघिका ४८ जना संक्रमित विदेशबाट आएर क्वारेन्टिनमा बसेका थिए । जिल्ला बाहिरबाट म्याग्दीमा आएकामा कोरोना पुष्टि भएको यो पहिलो पटक हो । 

म्याग्दीबाट हालसम्म एक हजार १३४ वटा स्वाबको नमुना संकलन गरी पीसीआर विधिबाट परीक्षणका लागि पठाइएको छ । एक हजार १०९ वटाको नतिजा आएको छ । २५ वटाको नतिजा आउन बाँकी छ ।