बेनी : म्याग्दीको अन्नपूर्ण गाउँपालिका–३ मा रहेको प्रसिद्ध पर्यटकीयस्थल रुप्से उजाडिएको छ। रुप्सेखोलामा गत महिना आएको बाढीले सुन्दर झरनालाई उजाड बनाएको हो । पर्यटन विकासका लागि निर्माण भएका भौतिक संरचना क्षत विक्षत भएको छ । अग्लो पहाडबाट छङछङ झर्ने रुप्से झरनाको वरपर बाढी र पहिरोले छियाछिया बनाएको छ ।
रुप्सेको प्राकृतिक सौन्दर्य बाढीले खोसेको छ । बाढी पछि झरनामा धमिलो पानी खसेको छ । सफा पानी आउँदा सुन्दर देखिने रुप्सेको संरचना फेरिएको छ । मनमोहक रुप्सेलाई बाढीले बिरक्त बनाएको स्थानीयबासी रिता बरुवालले बताइन् ।
झरना परिसरको मन्दिर बाढीले बगाएको छ । बेनी–जोमसोम सडक अन्तरगत पर्ने रुप्से मुस्ताङ जाने र आउनेहरुका लागि आकर्षक गन्तव्य थियो । दैनिक सयौं मानिसहरु रुप्सेको सौन्दर्यमा रमाउथे ।
सडक देखि झरनाको माथिल्लो फेदीसम्म पुग्न निर्माण भएको पदमार्ग समेत बगाएको छ । रुप्से परिसरमा बेनीका ब्यवसायी सुवर्ण खत्रीले डेढ वर्षदेखि सञ्चालन गरेको वाटरगड रिसोर्टको नामनिशान छैन् । भ्यू प्वाइन्ट, रुप्से देखि अन्धगल्छी जाने बाटो पनि पहिरोसँगै बगेको छ
रुप्सेस्थित निर्माणाधिन र चालु अवस्थाको मोटरेबल पुल बाढीले बगाएको छ । रुप्से क्षेत्रमा करिब तीन सय मिटर सडक पहिरो र बाढीले बगाएको छ । रुप्सेको प्राकृतिक स्वरुप पुरानै अवस्थामा आउन दुई तीन वर्ष लाग्ने वडा सदस्य हस्त पुनले बताए । उनका अनुसार ५० को दशकको सुरुवातमा पनि बाढीले रुप्सेलाई अहिलेको जस्तै कुरुप बनाएको थियो ।
करिब एक महिनासम्म अवरुद्ध भएको सडक गत हप्तादेखि खोलिएको थियो । रुप्से झरना भन्दा माथिको जंगलमा पहिरो गएका कारण आएको बाढीले तितर, भुरुङ्ग तातोपानी लगायतका तटीय क्षेत्रमा समेत क्षति गरेको छ ।
प्रतिक्रिया दिनुहोस !
