परासी : पश्चिम नवलपरासीका एम्बुलेन्स चालकका लागि पठाएको पीपीइ सीडीओले नदिएको गुनासो चालकले गरेका छन् । संयुक्त एम्बुलेन्स चालक संघको आग्रहमा प्रदेश ५ को सामाजिक विकास मन्त्रालयले प्रदेशका १२ वटै जिल्लामा रहेका एम्बुलेन्स चालकलाई पीपीइ सेट र गम्बुटलगायतका स्वास्थ्य सामग्री उपलब्ध गराएको थियो ।
मन्त्रालयले सबै जिल्लाका चालकका लागि पीपीइ पठाएको जनाए पनि चालकहरुले भने नपाएको गुनासो गरेका हुन् । लकडाउन सुरु भएपछिको बैशाखको पहिलो सातामा प्रदेशका सबै जिल्ला प्रशासन कार्यालय मार्फत् चालकहरुका लागि उक्त सामग्री पठाइएको मन्त्रालयले जनाएको छ । 'मुख्यमन्त्रीज्यूको कार्यकक्षमा बैठक बसेर सबै जिल्लामा पीपीइ पठाउने निर्णय भएअनुसार नवलपरासी जिल्ला प्रशासनमा पनि सोही समयमा पठाइ सकिएको हो । कसरी चालकहरुले पाएनन् उतै बुझ्नु पर्ला मन्त्रालयका प्रदेश स्वास्थ्य आपूर्ति व्यवस्थापन केन्द्रका निर्देशक दिनेश चापागाईले अन्नपूर्णसँग भने ।
संयुक्त एम्बुलेन्स चालक संघ नेपालका केन्द्रीय महासचिव मुक्ति काफ्लेले मन्त्रालयमा भएको बैठकमा हरेक जिल्लामा २० वटा पीपीइ पठाउने निर्णय भएपनि जिल्लाका चालकहरुले भने ८ देखि १० भन्दा बढी नपाएको बताए । हरेक जिल्ला प्रशासन कार्यालयमा कम्तीमा १५ वटा पीपीई नघट्ने गरी पठाइएको निर्देशक चापागाईले बताए । 'पठाउन १५ वटा भन्दा कम पठाइएको छैन तर जिल्लाले अरु कसैलाई दिएर घटेको हुन सक्ला,' चापागाईले भने ।
प्रशासनमा पठाइएको पीपीई माग्न जाँदा तत्कालीन सीडीओले आलटाल गरेर नदिएको संयुक्त एम्बुलेन्स चालक संघ नवलपरासीका जिल्ला अध्यक्ष कृष्ण सहानीले बताए । 'पीपीई पठाउँदा तत्कालीन सीडीओ बासुदेव दाहाल थिए, 'तत्कालीन सीडीओ साहेब दाहालहसँग मन्त्रालयले पठाएको पीपीई पटकपटक माग्न गयौं । २-४ दिनमा दिन्छु भन्दै आलटाल गर्दै दिनु भएन । त्यसपछि माग्नै छाड्यौं,'सहानीले भने ।
सुनवल नगरपालिकाले स्थानीयस्तरमा उत्पादन गरेका केही सेट पीपीई बाहेक सरकारबाट अहिलेसम्म सामान्य मास्क र पञ्जा समेत नपाएको अवस्थामा मन्त्रालयले पठाएको पीपीई समेत पाउन नसकिएको सहानीले गुनासो गरे ।
प्रमुख जिल्ला अधिकारी सागरमणि पाठकले आफू सरुवा भइ आउनुभन्दा पहिलाको कुरा भएको बताए ।'म आउनुभन्दा पहिलेको कुरा रहेछ । कार्यालयमा बुझ्दा उक्त पीपीई आएको भन्ने कतै पाइएन । कस्ले बुझ्यो ? खोजी गरौला, 'उनले भने ।
प्रतिक्रिया दिनुहोस !
