बागलुङमा स्वास्थ्यकर्मीसहित दुईजनामा कोरोना संक्रमण, संक्रमितको संख्या २ सय ९४

बागलुङ : जिल्लाको दुर तमानखोला गाउँपालिकामा पहिलो पटक समुदायस्तरमा एक स्वास्थ्यकर्मीसहित दुईजनामा कोरोना देखिएको छ । तमानखोला गाउँपालिकाले भदौ १० गते समुदायस्तरमा स्वास्थ्यकर्मी, जनप्रतिनिधि, व्यापारी, प्रहरी र संघ संस्थाका ६० जनाको नमुना परीक्षणका लागि स्वाब संकलन गरेको थियो । जसमध्ये क्षयरोग उपचार केन्द्र पोखरामा गरिएको पीसीआर परीक्षणमा तमानखोला गाउँपालिका वडा नम्बर २ का १ महिला स्वास्थ्यकर्मी र अर्का एक महिलामा आइतबार कोरोना संक्रमण पुष्टी भएको हो।

संक्रमित हुनेमा ३० वर्षीया स्वास्थ्यकर्मी गाउँपालिकाको क्वारेन्टिन व्यवस्थापनमा खटिएका हुन् भने २३ वर्षीया महिला सोही ठाउँमा व्यवसाय गर्दै आएकी छिन् । संक्रमण देखिएकोमा रुघाखोकी र ज्वरोको लक्षण समेत देखिएको गाउँपालिकाका स्वास्थ्य संयोजक तिलबहादुर छन्त्यालले बताए । 

पहिले विदेशबाट आएर क्वारेन्टिनमा बसेका यसअघि पनि संक्रमित भएता पनि समुदायस्तरमा गाउँपालिकामा पहिलो पटक संक्रमण देखिएको हो । तमानखोला जिल्लाकै दुर्गम गाउँपालिका मध्येमा पर्दछ । 

जिल्लाको पश्चिम क्षेत्र ढोरपाटन नगरपालिका, निसीखोला गाउँपालिका र तमानखोला गाउँपालिकाको कोरोना संक्रमित बिरामी राख्नका लागि ढोरपाटन नगरपालिकाको बुर्तिवाङ  प्राथमिक स्वास्थ्य केन्द्रमा आइसोलेसन बनाइएको छ । तर, तमानखोलाका दुवै संक्रमितमा कोरोनाका लक्षण देखिएकाले धौलागिरी अस्पताल बागलुङकै आइसोलेसनमा ल्याइने प्रमुख जिल्ला अधिकारी सुरेश न्यौपानेले जानकारी दिए । 

यसअघि बागलुङ नगरपालिका, काठेखोला गाउँपालिका, बडिगाड गाउँपालिकामा समुदाय स्तरमा कोरोना संक्रमण पुष्टि भएको थियो । अन्य पालिकामा भने हाल सम्म समुदाय स्तरमा कोरोना देखिएको छैन । आइतबारसम्म जिल्लामा कोरोना संक्रमितको संख्या २ सय ९४ जना पुगेको छ । जसमा २ सय ६१ जना निको भइसकेका छन् भने ३२ जना आइसोलेसनमा छन् । एकजना युवकको मृत्यु भइसकेको छ ।