कालिकोट पहिरोमा पुरिएर एकै परिवारका ४ सहित १० जनाको मृत्यु, दुई घाइते

कालिकोट : जिल्लाको तिलागुफा नगरपालिका वडा नं. १ नाग्म बजारमा गएको पहिरोमा मृत्यु हुनेको संख्या १० पुगेको छ । आइतबार बिहन साढे ७ बजे गएको पहिरोमा परी पुरिएर १० जनाको मृत्यु भएको जिल्ला प्रहरी प्रमुख डिएसपी श्यामबाबु ओलीयाले जानकारी दिए ।

उनका अनुसार पहिरोमा मृत्यु हुनेहरुमा नाग्म बजारमा व्यपार व्यवसाय गरि बसेका ४० वर्षीय परेक शाही, उनको छोरा ५ वर्षीय निराजन शाही, उनको दुई महिनाको छोरा अक्कल शाही, ७ वर्षीया छोरी हिमा शाही छन् ।

यस्तै  ३५ वर्षीय मनवीर कटुवाल, ४५  वर्षीया आइती खड्का, ३० वर्षीय टेकबहादुर दमाई, २५ वर्षीय छोइनो दमाई,  ६ वर्षीय गजेन्द्र दमाई, २३ वर्षीय अमृत थापा छन् ।

मृतक परेक शाहीकी पत्नी पुन्या शाही र स्थानीय अर्जुन हमालको जीवीत नै उद्धार गरी उपचारका लागि कर्णाली स्वास्थ्य विज्ञान प्रतिष्ठान जुम्ला पठाक्इएको छ । आइतबार बिहानदेखि नेपाल प्रहरी, सशस्त्र प्रहरी, नेपाली सेना र स्थानीयहरुको सक्रियतामा खोजी तथा उद्वार भइरहेको छ । पहिरोमा दुई खुद्रा पसल भएका घर र दुई कुखुरा पालनका घर भएकाले समान लिन आएका मानिसहरु पनि पुरिएको हुनसक्ने प्रहरीको अनुमान छ ।