संस्कृत विश्वविद्यालयमा विश्वभरीबाटै अध्ययन गर्न सकिने
![संस्कृत विश्वविद्यालयमा विश्वभरीबाटै अध्ययन गर्न सकिने](https://annapurnapost.prixacdn.net/media/albums/sanskrit-university_20200831110824_AJtjoPkmWT.jpg)
दाङ : दाङमा केन्द्रीय कार्यालय रहेको नेपाल संस्कृत विश्व विद्यालय अब प्रविधिमैत्री बन्ने भएको छ । २०४१ सालमा स्थापना भएको विश्व विद्यालय अहिलेसम्म परम्परागत शैलीबाट नै सञ्चालन हुँदै आएकोमा अब प्रविधिको उच्चतम प्रयोग गरेर शैक्षिक क्रियाकलाप सञ्चालन गर्न लागेको हो ।
परम्परागत कार्यलाई रिरुत्साहित गर्दै विश्व विद्यालयका सबै कार्यक्रम प्रविधिमैत्री बनाइने र परीक्षा पठनपाठन समेत आवश्यक अवस्थामा प्रविधिबाटै सञ्चालन गर्ने गरी तयारी गरिएको संस्कृत विश्वविद्यालयका कुलसचिव माधव अधिकारीले बताए ।
संस्कृत शिक्षाको थलोको रुपमा विकास भएको विश्व विद्यालयले विश्वका जुन सुकै देशमा रहेका नेपालीले संस्कृत शिक्षा पढ्न चाहेमा अनलाइनमार्फत शिक्षण गराउन सकिने गरी समेत तयारी थालेको छ ।
यसका लागि विश्वविद्यालयमा रहेको प्रविधि र गुरुहरुको अभ्यासलाई बढवा दिइराखिएको कुल सचिव अधिकारीले बताए । उनले सबै प्रकारका शैक्षिक गतिविधिहरु विश्व विद्यालयको वेव साइडबाट नै नियमित रुपमा प्रकाश भइरहेको र अब परिक्षा फल मात्रै नभएर लब्धाङग पत्र समेत हेर्न सकिने व्यवस्था गरिएको जानकारी दिए ।
कोरोना संक्रमणका बीच कसरी शिक्षालाई निरन्तरता दिने भन्ने विषयमा नेपाल संस्कृत विश्वविद्यालयले गरेको अनलाइन पत्रकार भेटघाट कार्यक्रममा यस्तो जानकारी गराइएको हो । कोरोना संक्रमणको जोखिमका बीच विश्वविद्यालयमा भैरहेका शैक्षिक तथा प्रबिधि सम्बन्धी कामहरुको जानकारी दिइएको थियो ।
विश्वविद्यालयका उपकुलपति रमेशप्रसाद ढकालले विश्वविद्यालयलाई संकटको बेला कसरी अघि बढाउने भन्ने बिषयमा व्यवस्थित योजना बनाएर काम गरिरहेको बताए । अनलाइन सफ्टवेयर तयार गरी प्राध्यापक, विद्यार्थी र कर्मचारीलाई प्रविधिमा जोडेर काम गरिरहेको उनले जानकारी दिए ।
विश्वविद्यालयका कूलसचिव अधिकारीले लकडाउनको समयमा पनि अनलाइन पद्धतीको विकास गरी बिद्यार्थीहरुलाई शिक्षा दिइरहेको जानकारी दिए । बिभिन्न बिषयमा अध्ययन अनुसन्धान गरी विश्वविद्यालयलाई समयानुकूल विकास गर्दै लगिरहेको उनले बताए ।
विभिन्न क्याम्पसहरुको भौतिक, प्रविधि र शैक्षिक प्रगतिका लागि भएका कामहरुबारे उनले जानकारी दिए । लकडाउनकै बीच गुरुयोजना निर्माण गरी बिभिन्न शैक्षिक तथा भौतिक विकासका कामहरु भैरहेको उनले बताए । संस्कृत विश्वविद्यालयको भौतिक पूर्वाधार उपयोग गरी प्रदेश सरकारसँग समन्वय गरेर बेलझुण्डीमा कोरोना विशेष अस्पताल सञ्चालन गरेको र अहिलेसम्म निरन्तर सञ्चालन भइरहेको अधिकारीले जानकारी दिए ।
परीक्षा नियन्त्रक निलप्रसाद सापकोटाले परीक्षा नियन्त्रण कार्यालयलाई पनि अनलाइन प्रबिधिमा जोडेर काम गरिरहेको बताए । परीक्षाको नतिजा अनलाइनमा राख्ने काम गरेको उनले जानकारी दिए । कोरोनाको समस्या लम्बिरहेमा परीक्षा कसरी सञ्चालन गर्ने भन्ने बिषयमा छलफल भइरहेको उनले भनाइ थियो ।
चैतमा तोकेको परीक्षाहरु कोरोनाका कारण पछि सरेको र भदौमा गर्न खोज्दा पनि कोरानाको प्रभाव अझ बढी देखिएको भन्दै उनले अनुकुल वातावरण भएमा तत्काल परीक्षा सञ्चालन हुने बताए ।
परीक्षा नियन्त्रक सापकोटाले अहिले परीक्षा नियन्त्रण कार्यालयले प्रविधिलाई आत्मासाथ गर्दै लब्धाङ पत्र समेत वेब साइडमै राखिएको बताए । परीक्षार्थीलाई सहज होला भनेर सिम्बोल नं र जन्ममितिको आधारमा लब्धाङ पत्र वेवसाइडमै हेर्न सक्ने गरि प्रविधिको विकास गरिएको जानकारी दिए । यो विश्व विद्यालयको प्रविधिको उपलब्धी मुलक कार्य मान्न सकिन्छ ।
आयुर्वेद अध्ययन संस्थानका डिन डा. सञ्जय पोखरेलले आयुर्वेद शिक्षाको महत्वलाई बढवा दिइरहेको बताए । कोरोनाको समस्यालाई मध्यनजर गरी आयुर्वेदको औषधि उत्पादन र यसको उपयोगिताबारे खोज अनुसन्धान भइरहेको जानकारी दिए । प्रविधिविज्ञ दिपेन्द्र पौडेल र गोविन्द पाण्डेले विश्वविद्यालयमा जडान भएका पछिल्ला सूचना प्रविधिबारे जानकारी गरएका थिए ।
प्रतिक्रिया दिनुहोस !
![Unity](https://annapurnapost.prixacdn.net/static/assets/images/unity-logo.png)