बेंसीसहर : लमजुङमा मंगलबार बिहान १४ दिनको बालकसहित थप २६ जनामा कोरोना संक्रमण पुष्टि भएको छ । मंगलबार बिहान क्षयरोग उपचार केन्द्र पोखरामा गरिएको परीक्षणमा १६ पुरुष र १० महिला गरी २६ जनामा कोरोना पोजिटिभ देखिएको हो ।
लमजुङमा कार्यरत नेपाल प्रहरीका ३ पुरुष र एक महिला, जिल्ला सामुदायिक अस्पतालमा वार्डमा रहेको १४ दिनको बालकसहित ५ जना, अस्पतालमा कार्यरत एक पुरुष कर्मचारी, बेसीसहरमा कार्यरत एक सञ्चारकर्मी महिलामा समेत कोरोना संक्रमण पुष्टि भएको छ ।
त्यस्तै कन्ट्याक ट्रेसिङबाट लमजुङका स्थानीय ६ महिला र ९ पुरुष गरी १५ जनामा कोरोना संक्रमण पुष्टि भएको गण्डकी प्रदेश स्वास्थ्य निर्देशनालय पोखराले जनाएको छ । योसँगै लमजुङमा हालसम्म कोरोना संक्रमितको संख्या २१५ जना पुगेका छन्, भने उपचारपछि घर फर्किएको संख्या ११३ जना पुगेको प्रमुख जिल्ला अधिकारी कृष्णप्रसाद शर्माले जानकारी दिए ।
लमजुङमा हालसम्म आइसोलेसनमा बस्नेको संख्या १ सय २ जना पुगेको छ । तर, जिल्लामा आइसोलेसन क्षमता १ सय बेडको मात्र रहेको छ । आइसोलेसनमा बेड संख्या बढाउने विषयमा छलफल भइहेको प्रजिअ शर्माले जानकारी दिए ।
प्रतिक्रिया दिनुहोस !
