बैतडी : बैतडीको डिलाशैनी गाउँपालिका ६ सौनगाउँका पहिरो पीडित त्रिपालमुनी बस्न बाध्य भएका छन् । यही भदौ २ गतेको वर्षासँगै खसे पहिरोले ८ परिवार बस्ने ३ घर भत्काएपछि पहिरो पीडित नजिकैको विद्यालयको प्रांगणमा त्रिपाल हालेर बसिरहेको स्थानीय हरिदत्त जोशीले जानकारी दिए । उनले भने, 'डिलाशैनीका पहिरो पीडित थुप्रै समस्या झेलिरहेका छन् । उनीहरुलाई गास,बास र कपासको समस्या भएको छ ।'
अहिले आफूहरुलाई गास,बास र कपासको निकै समस्या भएको उहाँले बताउनुभयो । विस्थापित ८ वटै परिवार जमीन समेत पहिरोले बगाईसकेकाले घर बनाउन समेत जमीन बाँकी नरहेको स्थानीय बहादुर लुहारले बताए । पहिरोले विस्थापित भएपछि वडा कार्यालयबाट ४ त्रिपाल र साडा नामक गैरसरकारी संस्थाबाट ४ त्रिपाल बाहेक अन्य कुनै सहयोग प्राप्त नभएको स्थानीय काशीराम लुहारले बताए । उनले भने, 'हामीहरुलाई दैनिक छाक टार्न मुस्किल भएको छ । कहिले सम्म विद्यालयमा बस्ने ? हाम्रो व्यवस्था गरिदिन सरकारसंग आग्रह गर्दछौं ।'
विस्थापित परिवारलाई खानेपानी,शौचालयको समेत समस्या भएको छ भने दैनिक छाक टार्न समेत मुस्कील भएको छ । त्रिपालमुनि रात काट्न निकै मुस्कील भएको स्थानीय प्रेमराम लुहारले बताए । बालबालिकहरुलाई खुवाउन लागि समेत खाना नहुँदा समस्या भएको उहाँको भनाई छ । पहिरोका कारण डिलाशैनी ६ को सौनगाउँ पुरै जोखिममा रहेको बताइएको छ ।
पहिरो पीडित सदरमुकाममा
पहिरोले घर भत्काएपछि आफूहरुको समस्या समाधान गरिदिन भन्दै डिलाशैनीका पहिरो पीडितहरु जिल्ला सदरमुकाम पुगेका छन् । प्रमुख जिल्ला अधिकारीसंग आफ्ना समस्या राख्नका लागि आफूहरु सदरमुकाम पुगेको स्थानीय प्रेमराम लुहारले बताए । उनले भने, 'हामी अहिले विद्यालयको प्रांगणमा बसीरहेका छौं । हाम्रो जमीन पनि छैन् । अब हामीले कुन ठाउँमा बस्ने ? हाम्रो समस्या लिएर सिडिओ अफिसमा पुगेका हौं ।' पहिरोले ८ परिवारको उठीबास भएकाले वैकल्पिक व्यवस्था गरिदिन भनेर आफूहरु सदरमुकाम पुगेको उनीहरुले बताएका छन् ।
प्रतिक्रिया दिनुहोस !
