भक्तपुर : भक्तपुरको चाँगुनारायण नगरपालिका ८ सुडालस्थित बोझिनी कृत्रिम पोखरीमा पौडी खोल्न जाँदा वेपत्ता युवकको लास मंगलबार फेला परेको छ । पाँचथर तुम्बेवा गाउँपालिका ४ घर भई हाल सुडाल बस्ने २५ वर्षीय अमन भनिने योगेन्द्र लिम्बू सावा उक्त पोखरीमा पौडी खेल्न जाँदा डुबी बेपत्ता भएका थिए ।
महानगरीय प्रहरी परिसर भक्तपुरका अनुसार मंगलबार सुरक्षाकर्मीको उद्धार टोलीले पोखरीको लेदोमा गाडिएको अवस्थामा लिम्बूको लासलाई फेला पारिएको हो । परिसरका प्रवक्ता प्रहरी नायब उपरीक्षक दीपक गिरीले कानुनी प्रक्रिया पूरा गरी लासलाई पोस्टमार्टमको लागि चाँगुनारायण नपा २ दुवाकोटस्थित काठमाडौं मेकिडल कलेज शिक्षण अस्पताल पठाइएको जानकारी दिए ।
मृतक योगेन्द्र प्रकाश लिम्बूसँग सोमबार पौडी खेल्न भनी बोझिनी कृत्रिम पोखरी पुगेका थिए । प्रहरीले प्रकाशसँग घटनाबारे सोधपुछ गरेको जनाएको छ । सुरक्षाकर्मीले सोमबार नै मृतक योगेन्द्रको उद्धार प्रयास गरेको थियो ।
तर वर्षाको कारण हुन नसकेको परिसर प्रवक्ता प्रहरी नायब उपरीक्षक गिरी बताउँछन् ।मंगलबार भक्तपुर प्रहरी, सूर्यविनायकस्थित नेपाली सेनाको वीरदल गण र काठमाडौंको सिनामंगलस्थित सशस्त्र प्रहरीको २० नं. गण विपद व्यवस्थापन उद्धार टोलीको गोटाखोरले पोखरीभित्र पसेर खोजी गर्ने क्रममा योगेन्द्रको शव लेदोमा गाडिएको अवस्थामा भेट्टाएको हो ।
स्थानीयका अनुसार उक्त कृत्रिम पोखरीमा यससँगै दुईजनाले ज्यान गुमाएका छन् । सुडालमा सिंचाइ सुविधाको लागि बोझिनी खोलामा बाँध निर्माण गरी उक्त कृत्रिम पोखरी निर्माण गरिएको हो । यसै वर्ष पोखरीको आधार दोब्बर फराकिलो बनाइएको हो ।
प्रतिक्रिया दिनुहोस !
