नर्वेजियन प्रधानमन्त्रीलाई स्कुले बालबालिकाले सोधे : हामीसँग पर्याप्त साबुन छ त ?
ओस्लो : नर्वेजियन प्रधानमन्त्री एर्ना सोलबर्गले कोरोनाभाइरसको खोप पत्ता लाग्नेमा आफू ढुक्क भएको बताइन् ।
साथै बालबालिकालाई दिइने धेरै रोगका खोपमध्ये यो पनि एक हुने बताइन् । बिहीबार बालबालिकाहरुसँग उनले यस्तो प्रतिक्रिया दिएकी हुन् । बालबालिकाको लागि आयोजित एक विशेष अन्तरक्रियामा सोलबर्गले यस्तो बताएकी हुन् । बालबालिकाको लागि गरिएको यो तेस्रो विशेष अन्तरक्रियामा वयष्कहरुले प्रश्न सोध्न नपाउने भनिएको थियो ।
कोरोनाभाइरसको महामारीपछि पहिलो कार्यक्रम मार्च १६ मा गरिएको थियो । जहाँ प्रधानमन्त्री सोलबर्गले बालबालिकालाई महामारीसँग डराउनु उचित भएको सुझाव दिएकी थिइन् । ‘मलाई लाग्छ कि, हामी खोप पत्ता लगाउनेछौँ, र यसको मतलब कोरोना रहिरहनेछ । तर हामीलाई यसबाट बच्ने र बिरामी नहुने खोप लगाइनेछ,’ सोलबर्गले भनिन् । प्रधानमन्त्रीले आफू सानो छँदा दादुरा लागेको जस्ता अनुभव पनि बालबालिकासँग ‘शेयर’ गरेकी थिइन् ।
तर दादुराविरुद्धको खोप अहिलेको नर्वेमा सबैजसो बालबालिकाले लगाउने गरेको उनले बताइन् । तर आफू सानो छँदा दादुरा डरलाग्दो रोग भएको बताइन् । ‘जब म सानो थिएँ, दादुरा डरलाग्दो रोग थियो । अहिले त्यसबेलाको दादुरा जस्तै कोरोनाभाइरस हुनेछ,’ उनले सुनाइन् ।
अन्तरक्रियामा बालबालिकाहरुले पनि उनीसँग यसबारे जिज्ञासा र प्रश्न गरेका थिए । बालबालिकाहरुले प्रधानमन्त्रीसँग यस्तो प्रश्न पनि सोधेका थिए कि, ‘के हामीसँग पर्याप्त साबुन छ ?’, ‘के नर्वेसँग महामारीपछि पनि पैसा रहनेछ ?’ ‘के हामीसँग राम्रो सुगन्ध आउने एन्टिब्याक्टेरिया छ ?’
प्रधानमन्त्रीले भने सुगन्ध नआउने भए पनि त्यसले काम गर्ने बताइन् । साथै कहिलेकाहीँ सुगन्ध आउने एन्टिब्याक्टेरिया पनि भेटिने बताएकी थिइन् । नर्वेमा अप्रिल २७ देखि स्कुलहरु खुलेका छन् । समर बिदापछि अगस्ट १७ देखि फेरि सञ्चालन भएका छन् । बालबालिकाहरुलाई फेस मास्क अनिवार्य नभए पनि उनीहरुले सामाजिक दूरी कायम गर्नुपर्ने हुन्छ । नर्वेमा हालसम्म कोरोनाबाट २ सय ६४ को मृत्यु हुनुका साथै १० हजार भन्दा धेरै संक्रमित भएका छन् ।