अमेरिकाको चुनावमा २० लाख हिन्दू समुदायको मत निर्णायक
वासिङटन : अमेरिकामा आगामी नोभेम्बरमा हुने राष्ट्रपतीय निर्वाचनमा मतदानका लागि विभिन्न समूह र सम्प्रदायलाई रिझाउने प्रयास भइरहेको छ ।
रिपब्लिकनको तर्फबाट वर्तमान राष्ट्रपति डोनल्ड ट्रम्प उम्मेदवार छन् भने प्रतिपक्षी डेमोक्रेट्सको तर्फबाट जो बाइडेन राष्ट्रपतिका उम्मेदवार छन् । दुबै नेताबीच वाकयुद्ध चल्नुका साथै मतदातालाई रिझाउन पनि प्रतिस्पर्धा चलिरहेको छ ।
यस्तैमा अमेरिकाका विभिन्न राज्यमा हिन्दू समुदायले पनि निर्वाचन प्रभावित पार्नसक्ने बताइएको छ । इन्डियन अमेरिकन विधायक राजा कृष्णमुर्तिले अमेरिकामा रहेका २० लाख हिन्दूहरुको समुदायले कसैलाई विभिन्न राज्यमा हराउन वा जिताउन सक्ने बताए ।
मतदानको अभ्यासलाई धर्मसँग तुलना गर्दै उनले भर्चुअल सम्बोधनको क्रममा यस्तो बताएका हुन् । डेमोक्रेटिकबाट तीन पटक विधायक बनेका कृष्णमुर्तिले आफ्नो समुदायलाई जो बाइडेनको पक्षमा भोट मागेका छन् । त्यसो त, बाइडेनको उपराष्ट्रपति भारतीय मूलकी कमला ह्यारिस उम्मेदवार छिन् ।
‘मलाई लाग्छ कि, जो बाइडेनलाई जिताउनु धेरै महत्वपूर्ण छ । हिन्दू मुल्य वशुधैव कुटुम्वकमको मुल्यका आधारमा पनि हामी हरेक मानिसलाई आदर र आत्मसम्मानसाथ व्यवहार गर्छौँ,’ उनले भने ।
साथै कृष्णमुर्तिले यस वर्षको चुनाव आफूहरुको जीवनकालकै अति महत्वपूर्ण चुनाव हुने अपेक्षा गरे । आगामी नोभेम्बर ३ मा अमेरिकामा चुनाव हुँदैछ । अमेरिकाका २० लाख हिन्दू, अमेरिकन मतदानमा थुप्रै राज्यमा निर्णयक भूमिका खेल्नसक्ने बताइन्छ ।
बाइडेनको चुनावी अभियानका निर्देशक अमित जैनले भनेका छन्, ‘मतदान हाम्रो धर्म हो । र यो हाम्रो समाजको मुटुमा छ ।’ यस्तै बाइडेनको अभियानका न्युजर्सीस्थित सहायक निर्देशक निक्की शाहले पछिल्ला साढे तीन वर्षमा अमेरिकामा घृणा र अपराधका घटना बढेको भन्दै वर्तमान सरकारको आलोचना गरेका थिए ।
साहले ट्रम्पको नेतृत्वमा हिन्दूहरुविरुद्ध घृणा र अपराध तीव्र रुपमा बढेको बताए । बाइडेनले जितेमा यस्ता गतिविधि घट्नेमा आफूहरु विश्वस्त भएको इन्डियन अमेरिकन नेताहरुको भनाइ थियो ।
म्निनगर स्वामीनारायण मन्दिरका प्रवक्ता राजेश पटेलले पनि विस्तृतमा मन्तव्य दिएका थिए । उनले मन्दिर तोडफोडबारे विस्तृतमा रिपोर्ट प्रस्तुत गरेका थिए । कृष्णमुर्तिले बाइडेनलाई आस्थावान र समानताको पक्षधर नेता भएको भन्दै प्रशंसा गरेका थिए । उनले हरेक नागरिकलाई सम्मान र आदर दिनुपर्ने ठान्छन् भन्दै बाइडेनको पक्षमा हिन्दू समुदायका नेताहरुले भोट मागेका थिए । ट्रम्प हिन्दू समुदायको समर्थन पाएका एक नेता हुन् । तर पछिल्लो समय हिन्दू समुदायको प्रतिनिधित्व गर्ने भारतीय अमेरिकीहरु वर्तमान सरकारप्रति रुष्ट छन् ।