भारतमा एकैदिन कोरोना भाइरसबाट थप ८६ हजार मानिस संक्रमित भएका छन् । शनिवार दिइएका विवरणअनुसार २४ घण्टाको अवधिमा ८६ हजार ४३२ नयाँ संक्रमित भेटिएका छन् । यो संख्या दैनिक सर्वाधिक वृद्धि हो । साथै विश्वमा अन्यत्र कुनै देशमा पनि एकैदिन यति धेरै संख्यामा संक्रमित भेटिएका छैनन् ।
बितेका तीन दिनदेखि भारतमा लगातार प्रतिदिन ८० हजारभन्दा धेरै संक्रमित थपिएका छन् । भारतको स्वास्थ्य मन्त्रालयका अनुसार त्यहाँ हालसम्म कोरोना भाइरस संक्रमणका कुल ४० लाख २३ हजारभन्दा धेरै मामिला भेटिएका छन् ।
तीमध्ये साढे आठ लाख जति सक्रिय संक्रमित छन् भने ३१ लाख मानिस निको भइसकेका छन् ।
हालसम्म त्यहाँ कोभिड-१९ का कारण ६९,५६१ मानिसको ज्यान गइसकेको छ । शनिवार दिइएको विवरणमा २४ घण्टाको अवधिमा त्यहाँ १०८९ जनाको ज्यान गएको छ। अमेरिकाको जोन्स हप्किन्स विश्वविद्यालयले राखेको विवरण बमोजिम संसारभरि कोरोना भाइरसबाट संक्रमित हुनेको संख्या २ करोड ६६ लाख नाघेको छ ।
कोभिड-१९ ले हालसम्म संसारका आठ लाख ७६ हजार मानिसको ज्यान लिइसकेको छ।
प्रतिक्रिया दिनुहोस !
