तमानखोलामा चार स्वास्थ्यकर्मीसहित ९ जनामा कोरोना संक्रमण

बागलुङ : जिल्ला सदरमुकामको समुदायस्तरमा फैलिएको कोरोना संक्रमणको जोखिम कम हुँदै गएपनि दुरको तमानखोला गाउँपालिकामा कोरोना संक्रमण बढ्दै गएको छ । मंगलबार मात्रै थप ९ जनामा कोरोना संक्रमण पुष्टि भएको छ । संक्रमित मध्ये चारजना स्वास्थ्यकर्मी हुन् ।

क्षयरोग उपचार केन्द्र पोखरामा गरिएको पीसीआर परीक्षणमा तमानखोला गाउँपालिकाका ६ जना महिला र ३ जना पुरुषलाई कोरोना संक्रमण पुष्टि भएको स्वास्थ्य कार्यालय बागलुङका प्रमुख सुरज गरौले जानकारी दिए ।

उनका अनुसार, तमानखोला गाउँपालिका वडा नम्बर १ का ३८ वर्षीय पुरुष, ४० वर्षीय पुरुष, २३ वर्षीया महिला, २९ वर्षीया महिला, २२ वर्षीया महिला, २८ वर्षीया महिला, वडा नम्बर २ का १८ वर्षीया महिला, वडा नम्बर ५ का ३० वर्षीाय महिला र वडा नम्बर ८ की १९ वर्षीय पुरुषाई कोरोना संक्रमण पुष्टि भएको छ ।

गत भाद्र १४ गते तमानखोला गाउँपालिका–२ की एक स्वास्थ्यकर्मी र एक व्यवसायी महिलालाई कोरोना संक्रमण पुष्टि भएको थियो । उनीहरुको कन्ट्याक्ट ट्रेसिङबाट १ सय १९ जनाको स्वाब परीक्षणको लागि पठाइएकोमा ९ जनामा संक्रमण देखिएको गुरौले बताए । 

संक्रमितलाई जिल्लाको पश्चिममै रहेको बुर्तिबाङ प्राथमिक केन्द्रको आइसोलेसनमा ल्याउने तयारी छ । जिल्लामा हालसम्म कोरोना संक्रमितको संख्या ३ सय ८ जना पुगेको छ । जसमा २ सय ७२ जना निको भइसकेका छन् भने २६ जना आइसोलेसनमा छन् । एक जना युवकको मृत्यु भइसकेको छ ।