बागलुङ : जिल्लाको ताराखोला गाउँपालिकामा चट्याङ लागेर एक युवकको मृत्यु भएको छ। बुधबार राति वर्षासँगै परेको चट्याङ लागेर ताराखोला गाउँपालिका-३ फिलमिरेका २२ वर्षीय भिमबहादुर बस्नेतको मृत्यु भएको हो।
यसैबीच, भारी वर्षाका कारण ताराखोला ५ मपेश खोलाबाट आएको बाढीले खेतीयोग्य जमिन सँगै ५ वटा झोलुङ्गे पुलमा क्षती पुर्याएको छ। वडा नम्बर ५ को कमखोला घाट झोलुङ्गे पुल, वडा नम्बर ४ को मिच्चेक घाट झोलुङ्गे पुल र दोगाडी घाट झोलुङ्गे पुल बगाएको स्थानीय तम बहादुर घर्तीले जानकारी दिए।
बाढीले ताराखोला जलविद्युत प्रसारण लाइनका पोलहरु समेत बगाएकाले विद्युत अवरुद्ध भएको छ। वडा नम्बर ४ को दलानचौरमा रहेको काठको अस्थायी मोटरेबल पुलमा समेत क्षति पुर्याएकाले ताराखोलादेखि हरिचौर हटियासम्मको सडक पनि अवरुद्ध बनेको छ। वडा नम्बर ५ को सिंजालीचोकदेखि करिमेला र मपेश खण्डमा मोटर बाटोमा बाढी पसेपछि मोटरबाटो समेत अबरुद्ध बनेको स्थानीयले जानकारी दिए।
प्रतिक्रिया दिनुहोस !
