वासिङटन : अमेरिकाको सान फ्रान्सिस्को, उत्तरी क्यालिफोर्निया र नजिकैका अन्य केही सहर नजिकैको जंगलमा विशाल डढेलो लाग्दा हजारौँ प्रभावित भएका छन् ।
डढेलो नियन्त्रणमा आउन नसक्दा हजारौँ मानिस विस्थापित हुनु परेको छ । डढेलोबाट कम्तिमा तीन जनाको मृत्यु भएको बताइएको छ । ती सहरका आकाश डढेलोको मुस्लोले भरिँदा डरलाग्दो सुन्तला रंगमा बदलिएको स्थानीय मिडियाले जनाएका छन् ।
सन फ्रान्सिस्को, ओकल्याण्ड र बर्कलेमाथिको आकाश आगोको मुस्लो र धुवाँले भरिँदा गाढा सुन्तला रंगमा बदलिएको छ । सिएनएन मौसमविद जुडसन जोन्सका अनुसार उक्त मुस्लोले गर्दा सूर्यको किरण सकेत छेकेर अन्धकारजस्तो देखिएको छ ।
डढेलोले गर्दा प्रदुषित वायु सहरमा फैलिएको साथै डढेलो बस्ती नजिकै विस्तार हुँदै गरेको बताइएको छ । स्थानीय अधिकारीका अनुसार यस पटकको डढेलो अघिल्ला वर्षको भन्दा भिन्न र डरलाग्दो छ ।
यद्यपि केही दिनमा मौसम ठीक हुँदै जाने र डढेलो रोकिने अनुमान गरिएको छ । १४ हजार भन्दा धेरै अग्नि नियन्त्रक खटिए पनि उनीहरु सफल हुन सकिरहेका छैनन् । हरेक दिन ठूलो भूभागमा आगो फैलिँदै गरेको छ । अहिलेसम्म २ दशमलब ५ मिलियन एकर भूभाग आगोले ढाकेको छ ।
प्रतिक्रिया दिनुहोस !
