कोरोना संक्रमणमुक्त भएका भारतीय गृहमन्त्री अमित शाह पुनः अस्पताल भर्ना
नयाँ दिल्ली : कोरोना संक्रमणमुक्त भएका भारतीय गृहमन्त्री अमित शाहलाई पुनः अस्पताल भर्ना गरिएको छ। भारतीय सञ्चारमाध्यमका अनुसार शाहलाई करिब दुई हप्तापछि पुनः गए राती दिल्लीस्थित एम्स अस्पताल भर्ना गरिएको हो।
गृहमन्त्री शाहले अगस्ट १४ मा कोरोना संक्रमण भएकाले आफू केही दिन घरमै आइसोलेसनमा रहने ट्वीटर मार्फत् बताएका थिए। तर अगस्ट १८ मा स्वास्थ्यमा समस्या आएपछि उनी एम्स अस्पताल भर्ना भएका थिए।
अस्पताल भर्ना भएको १३ दिनपछि उनी अगस्ट ३१ मा डिस्चार्ज भएका थिए। अस्पतालले अगस्ट ३० मा उनी निको भएकाले उनलाई डिस्चार्ज गरिएको बताएको थियो।
गत डिसेम्बरदेखि फैलिएको कोरोनाबाट हालसम्म भारतमा ४६ लाख ५९ हजार ९८४ संक्रमित भइसकेका छन्। जसमध्ये ३६ लाख २४ हजार १९६ निको भएका छन् भने ७७ हजार ४७२ को ज्यान गएको जोन्स हप्किन्स विश्वविद्यालयको तथ्यांक रहेको छ।