लण्डन : अक्सफोर्ड विश्वविद्यालय र अस्ट्राजेनिका औषधि कम्पनीको साझेदारीमा तयार हुँदै गरेको कोभिड १९ विरुद्धको खोपको परीक्षण फेरि सुरु भएको छ । अन्तिम चरणमा पुगेको भनिएको उक्त खोप परीक्षण प्रक्रिया परीक्षणमा सहभागी बिरामी परेपछि स्थगित भएको थियो ।
साथै अन्य स्थानमा भएका खोप विकासका काम पनि यससँगै केही दिनयता रोकिएका थिए । अक्सफोर्ड विश्वविद्यालय र अस्ट्राजेनिका कम्पनी मिलेर तयार पार्न लागेको कोभिड १९ विरुद्धको खोपको काम विश्वमा भएका अन्य प्रयास भन्दा अगाडि रहेको बताइन्छ ।
साथै अस्ट्राजेनिकाले खोप परीक्षणमा सहभागी व्यक्तिमा देखिएको स्वास्थ्य समस्याबारे अध्ययन गर्न एक स्वतन्त्र समितिले काम गरिरहेको पनि बताइएको छ । कम्पनीले ती व्यक्तिको पहिचान भने खुलाएको छैन । अक्सफोर्डका अनुसार स्वतन्त्र समीक्षा टोली र नियामक निकायबाट स्वतन्त्र छानविनपछि खोप परीक्षण सुरु गरिएको हो ।
संयुक्तराज्य अमेरिकामा अस्ट्राजेनिकाले ३० हजार व्यक्तिलाई परीक्षणमा सहभागी गराएको छ । बेलायतसहित ब्राजिल, दक्षिण अफ्रिका र अमेरिका लगायत देशमा खोप परीक्षणको काम भइरहेको छ ।
प्रतिक्रिया दिनुहोस !
