बर्दिबास : अदालतमा परेको मुद्धा मिलाइदिने बहानामा अभियुक्तको परिवारलाई ठगी गर्ने एक महिलालाई प्रहरीले पक्राउ गरेको छ। महोत्तरीको एकडारा गाउँपालिका–३ अजमरपट्टीकी ३७ वर्षीय ममता मण्डललाई पक्राउ गरिएको जिल्ला प्रहरी कार्यालय महोत्तरीका डीएसपी प्रकाश विष्टले बताए।
मण्डलले सम्सी गाउँपालिका–४ का लागुऔषध मुद्दाका अभियुक्त गौरीशंकर मण्डलको आमा तेत्तरी मण्डललाई ललाईफकाई १ लाख ८० हजार लिई गत साउन ५ गते फरार भएकी थिइन्। फरार भएकी मण्डललाई प्रहरीले जलेश्वर नगरपालिका–२ बाट पक्राउ गरेको हो।
गत असार ३० गते अभियुक्त गौरीशंकरलाई प्रहरीले ६ किलो ५ सय ग्राम गाँजासहित पक्राउ गरेको थियो। लागुऔषध शीर्षकमा मुद्दा चलाएकोमा उनी गत भदौं १५ गते १ लाख धरौटीमा अदालतबाट छुटेका थिए।
प्रतिक्रिया दिनुहोस !
