जापानी प्रधानमन्त्रीमा योसिहिदे सुगा निश्चित
टोकियो (बीबीसी): जापानको सत्तारूढ पार्टीले सिन्जो आबेपछि योसिहिदे सुगालाई आफ्नो नयाँ नेता चुनेको छ । यसले सुगा नै नयाँ प्रधानमन्त्री हुने निश्चितजस्तै भएको छ । प्रधानमन्त्री आबेले स्वास्थ्य स्थिति खराब भएका कारण गत महिना राजिनामा दिएका थिए । ७१ वर्षीय सुगा आबेका नजिकका व्यक्ति मानिन्छन् ।
उनी स्ट्रबेरी किसानको परिवारमा जन्मिएका हुन् । उनले टोकियोस्थित होसेई विश्वविद्यालयबाट स्नातक गरी संसदीय चुनाव अभियानमा काम गर्न थालेका थिए । उनले लिबरल डेमोक्य्राटिक पार्टीको एक सांसदको सचिवका रूपमा काम गरे । त्यसपछि उनले आफ्नै राजनीतिक यात्रा सुरु गरे । उनी सन् १९८७ मा योकोहामा सिटी काउन्सिलमा चुनिएका थिए । सन् १९९६ मा पहिलो पटक जापानको सांसद पदमा विजयी भएपछि उनको राजनीतिक यात्रा रोकिएन ।