सन्धिखर्क : अर्घाखाँचीको सन्धिखर्कमा हरेको जिल्ला कारागारमा क्षमताभन्दा दोब्बर बढी कैदीबन्दी राखिएको छ । हाल कारागारमा तीनजना महिला र ५७ जना पुरुष गरी ६० जना कैदीबन्दी रहेको जिल्ला कारागार कार्यालयका जेलर कृष्ण प्रसाद आचार्यले बताए ।
क्षमताभन्दा दोब्बर बढी कैदी राख्दा उनीहरुले पाउनुपर्ने न्युनतम सुविधासम्म पाएका छैनन् । पच्चीसजना कैदीको क्षमता रहेको कारागारमा दोब्बर बढी कैदिबन्दी राखेपछि उनीहरु कष्टकर जीवन बिताउन बाध्य भएका छन् ।
बजेट अभावले कारागारको स्तरोन्नति हुन नसक्दा कैदीहरु समस्यामा छन् । 'कारागार व्यवस्थापन विभागबाट गत वर्ष एउटा भवन बनेको छ, प्रमुख जिल्ला अधिकारी बिष्णु पौडेलले भने, 'वाल निर्माणका लागि विभागमा कुराकानी भइरहेको छ । कम्पाउन्ड वाल नहुँदा त्यस भवनमा कैदीबन्दी सार्न सकिएको छैन ।'
त्यो भवन प्रयोगमा आएपछि सहजरुपमा कैदीबन्दी बस्न मिल्नेछ । उक्त भवनको वाल सकिएपछि झन्डै ८० जना राख्न सकिने उनको भनाइ छ । २०४५ सालमा निर्माण गरिएको कारागार द्वन्दकालमा क्षतिग्रस्त भएको थियो ।
टालटुल पारेर २०७१ सालदेखि यहाँ कैदीबन्दी राख्न सुरु गरिएको सहायक प्रमुख जिल्ला अधिकारी विनोद खनालले बताए । बजेटको व्यवस्था भए कम्पाउन्ड मर्मत गरेर नयाँ भवनमा कैदी सार्न सकिने भएपनि त्यहाँ कसैको नजर पुग्न सकेको छैन ।
कोचाकोच भएर बस्नुपर्ने बाध्यताकै बीच यहाँ रहेका कैदीबन्दीले विभिन्न सिपमुलक तालिम लिइरहेका छन् । गतवर्ष बाँसबाट बन्ने र्याक र कुर्सी बनाउने तालिम दिइएकोमा यस वर्ष मुडा बुन्ने तालिम दिइएको कारागारका सई कृष्ण तामाङले बताए । 'क्षमता विकासका विभिन्न तालिम दिइरहेका छौं,' उनले भने, 'प्रती मुडा चार सय २० रुपैयाँमा बेचिरहेका छन् ।'
सिपमुलक तालिम पछी कैदीबन्दीले राम्रै आम्दानी गरिरहेको उनले बताए । कारागारको मर्मतका लागि ठोस बजेट नआएकाले दुःख खेप्नु परेको कारागार प्रमुख आचार्यको भनाइ छ । कारागार बनेको धेरै वर्ष भइसकेको र द्वन्दकालमा क्षतिग्रस्त भएकाले जीर्ण अवस्थामा रहेको उनको भनाइ छ । आफूहरुले सम्बन्धित निकायमा आवश्यक बजेटको माग गरिरहेको उनले बताए ।
प्रतिक्रिया दिनुहोस !
