धनगढी : कैलालीको गोदावरी नगरपालिका १० की गंगा बोहरा सेती प्रादेशिकअस्पतालको इमरजेन्सी कक्षमा विलौना गरिरहेकी थिइन् । उनलाई १९ वर्षीय छोरा सुरेश बोहराको शव पनि कसैले देखाउन मानेनन्।
हातमा क्यानला जोडिएकी र पखाला लागेकाले पटकपटक शौचालय जाने गरेकी गंगालाई छोराको शव देखाएमा स्वास्थ्यमा समस्या आउने भएकाले आफन्तले शव नदेखाएर नै सतगत गरिदिएका छन्।
घटना भदौ २८ गतेको हो । कैलालीको गोदावरी नरपालिका वडा नम्बर १० का प्रताप विष्टका घरमा उनका बुवाको श्राद्ध थियो । उनले, छोरी, भतिजिका परिवार, छिमेकी सबैलाई श्राद्धमा निम्तो गरेका थिए । गाउँघरमा सोह्र श्राद्धमा यसरी भोज नै गरिन्छ ।
प्रतापले बोलाएका अधिकांशमा खाना खाएको केही बेरपछि पेट दुख्ने, पखाला चल्ने र बान्ता हुने समस्या देखियो । परिवारका सदस्यहरुले अलि बढी भएकालाई आ–आफ्नो तरिकाले अस्पताल लगे । कसैले स्थानीय ग्वासी मेडिकलमा लगे भने कसैले मालाखेती अस्पताल र पदमा अस्पतालमा भर्ना गरे ।
श्राद्ध खाएका प्रायःजसो बिरामी पर्न थालेपछि, खानामा कुनै विषादी हुनसक्ने अनुमान गरिएका बेला २९ जना बिरामी परेको खबर थाहा भयो । सोही ठाउँका प्रताप बोहरा र गंगा बोहराका छोरा १९ वर्षीय सुरेश बोहराको त मंगलबार राती सेती प्रादेशिकअस्पतालमा उपचारका क्रममा ज्यान गएको छ ।
मृतकी आमा गंगा बोहरा, भाइ अर्जुन बोहरा, बहिनीहरु मुना बोहरा र दिपिका बोहरा, बज्यै बेलु बोहरा सेती प्रादेशिकअस्पतालमा भर्ना छन । 'दाई (मृतक) ले र मैले अली बढी अचार र खीर खाएका हौ,' मृतकका १२ वर्षका भाइ अर्जुनले भने । श्राद्ध भएको परिवार, मृतकको मावली घर हो ।
दुई बच्चासहित सोही ठाँउकी मनसरा ठगुन्ना पनि सेती प्रादेशिकअस्पतालको इमरजेन्सी वार्डमा भर्ना भएकी छिन । भन्छिन, 'म त श्राद्धमा गएन, श्रीमान दुबै बच्चा लगेर जानुभयो, मेरा लागि भात र अचार घरमै ल्याइ दिनु भएको हो । छोराले खीर मात्रै खाएको भन्दैथ्यो, अचार र खीर खाएकालाई बढी समस्या देखिएको छ।' मनसराका ६ वर्षको छोरा पारस र १२ वर्षीया छोरी राधा पनि अस्पताल भर्ना गरिएको छ।
श्राद्ध भएको परवारका युवक केशव विष्टले, दूध, तरकारी, डाल्डा, तेल, मसला सबै बाहिरबाट किनेर ल्याएकाले त्यसमध्ये केहीमा खराबी हुनसक्ने बताए । आमा शर्मा विष्टसँगै उनी पनि सेती प्रादेशिकअस्पताल भर्ना भएका छन् । 'बुवा सुगरका बिरामी, उहाँले खीर, अचार पनि खानु भएन, उहाँलाई केही भएन,' केशबले भने ।
प्रताप बोहराका १९ वर्षीय छोरा सुरेश बोहराको सेती प्रादेशिकअस्पतालमा पोष्टमार्टम पछि बुधबार दाहसंस्कार गरिएको छ । सेती प्रादेशिकअस्पतालका इमरजेन्सी वार्डका प्रमुख डाक्टर जगदिश जोशी पनि 'फुड पोइजन' का कारण युवकको मृत्यु भएको बताए।
'श्राद्धको खानामा कुनै समस्या थियो, कस्तो प्रकारको पोइजन हो भन्ने कुरा हेर्ने सेतीमा कुनै उपकरण छैन, तर पनि सबैलाई एकै प्रकृतिको बिराम देखिएकाले फुड पोइजन' भन्न सकिन्छ,' डाक्टर जोशीले भने । उनले, सेतीमा भर्ना भएकाहरु सबै खतरामुक्त रहेको बताए ।
प्रतिक्रिया दिनुहोस !
